హైదరాబాద్ రాజ్‌భవన్ పాఠశాలలో బాలల దినోత్సవం: విద్యార్థులకు సైకిల్ల పంపిణీ

హైదరాబాద్‌లోని రాజ్‌భవన్ ప్రభుత్వ పాఠశాలలో బాలల దినోత్సవం సందర్భంగా 10వ తరగతి విద్యార్థులకు సైకిల్లను పంపిణీ చేశారు. ఈ కార్యక్రమానికి మాజీ మంత్రి దానం నాగేందర్ హాజరయ్యారు.

కార్యక్రమంలో మాట్లాడుతూ.. దేశ భవిష్యత్తు విద్యార్థుల చేతుల్లోనే ఉందని ఆయన అన్నారు. నేటి బాలలే రేపటి పౌరులని దేశ తొలి ప్రధాని జవహర్‌లాల్ నెహ్రూ చెప్పిన మాటలను ఆయన గుర్తు చేశారు. నెహ్రూ బాలలను ఎంతో ప్రేమించేవారని, వారి విద్యాభివృద్ధిని ఎన్నో సందర్భాల్లో ప్రోత్సహించారని చెప్పారు.

విద్యార్థుల్లో దాగి ఉన్న సృజనాత్మకతను వెలికి తీసేలా ఉపాధ్యాయులు కృషి చేయాలని దానం నాగేందర్ సూచించారు. విద్యార్థులకు ఎలాంటి సహాయం అవసరమైనా తాను అండగా ఉంటానని హామీ ఇచ్చారు.

అనంతరం నెహ్రూ చిత్రపటానికి పూలమాల వేసి నివాళులు అర్పించారు. తనను ఆహ్వానించిన ప్రధానోపాధ్యాయులు గోపాల్, ఉపాధ్యాయులకు ఆయన కృతజ్ఞతలు తెలిపారు. జవహర్‌లాల్ నెహ్రూ జయంతి సందర్భంగా దేశవ్యాప్తంగా బాలల దినోత్సవం జరుపుకుంటున్న సందర్భంగా విద్యార్థులందరికీ ఆయన శుభాకాంక్షలు తెలిపారు.