నెల్లూరు జిల్లాలో మున్సిపల్ ఎన్నికల నామినేషన్లు: తొలి రోజు నెమ్మదిగా ప్రక్రియ

నెల్లూరు జిల్లాలో రెండో విడత మున్సిపల్ ఎన్నికల నామినేషన్ ప్రక్రియ మొదలైంది. కావలి, గూడూరు మున్సిపాలిటీలు, అల్లూరు నగర పంచాయతీలో తొలి రోజు నామినేషన్లు దాఖలయ్యాయి. ఉదయం 11 గంటల నుంచి మధ్యాహ్నం 3 గంటల వరకు నామినేషన్లు స్వీకరించారు.

తొలి రోజు నామినేషన్ల దాఖలు నెమ్మదిగా సాగాయి. నామినేషన్లకు సోమవారం వరకు గడువు ఉంది. దీంతో చివరి రోజు భారీ సంఖ్యలో నామినేషన్లు దాఖలయ్యే అవకాశం ఉందని అంచనా వేస్తున్నారు. ఆదివారం కూడా నామినేషన్లు స్వీకరిస్తారు.

కావలి మున్సిపాలిటీలో 44 డివిజన్లు ఉన్నాయి. ఇక్కడ రిటర్నింగ్ అధికారిగా మున్సిపల్ కమిషనర్ పని చేస్తున్నారు. 44 డివిజన్ల నామినేషన్లను ఆయనే పరిశీలిస్తున్నారు. TDP, జనసేన, BJP కూటమిలో సీట్ల కేటాయింపు ఇంకా ఖరారు కాలేదు. YSRCP తరఫున కూడా కొంతమంది అభ్యర్థులు నామినేషన్లు వేశారు. స్వతంత్ర అభ్యర్థులు వందల సంఖ్యలో నామినేషన్లు దాఖలు చేసే అవకాశం ఉందని తెలుస్తోంది.

ఈ నెల 17న నామినేషన్ల పరిశీలన జరుగుతుంది. 18, 19 తేదీల్లో ఉపసంహరణకు అవకాశం ఉంది. పోలింగ్ ఏర్పాట్లను అధికార యంత్రాంగం పూర్తి చేసింది.

జిల్లా కలెక్టర్ హిమాన్ శుక్ల పర్యవేక్షణలో ఏర్పాట్లు జరుగుతున్నాయి. ఎస్పీ అజితా విజయన్ పోలీస్ భద్రతపై ఆదేశాలు ఇచ్చారు. గూడూరులో సున్నితమైన ప్రాంతాలు, బూత్లను గుర్తించి ప్రత్యేక బందోబస్తు ఏర్పాటు చేస్తున్నారు. నామినేషన్ కార్యాలయంలోకి అభ్యర్థి, ప్రొపోజర్‌కు మాత్రమే అనుమతి ఇస్తున్నారు. సోమవారం టోకెన్ ఆధారంగా అభ్యర్థులను లోపలికి పంపనున్నారు.