హైదరాబాద్‌లో అక్రమ అండాల దంద: ఫెర్టిలిటీ సెంటర్లపై కేసులు, 12 మంది మహిళలు రక్షణ

హైదరాబాద్‌లో అక్రమ మానవ అండాల విక్రయం (egg sale) జరుగుతున్నట్టు వెలుగులోకి వచ్చింది. నగరంలోని ప్రముఖ ఫెర్టిలిటీ కేంద్రాలపై పోలీసులు క్రిమినల్ కేసులు నమోదు చేశారు.

సద్గురు హెల్త్ కేర్ సర్వీసెస్ ప్రైవేట్ లిమిటెడ్, దాని డైరెక్టర్ డాక్టర్ గేదెల దుర్గారావు, పలువురు ఏజెంట్లపై కేసులు నమోదయ్యాయి. జిల్లా వైద్య ఆరోగ్య శాఖ అధికారి ఇచ్చిన ఫిర్యాదు ఆధారంగా ఈ కేసులు నమోదు చేశారు.

బేగంపేటలోని అమీనితా గర్ల్స్ హాస్టల్‌పై పోలీసులు, వైద్య ఆరోగ్య శాఖ అధికారులు సంయుక్తంగా దాడి చేశారు. ఈ దాడుల్లో వివిధ రాష్ట్రాలకు చెందిన 12 మంది మహిళలను అధికారులు రక్షించారు.

నిరుపేద మహిళలకు ₹50,000 ఆశ చూపి, వారిని ఇతర రాష్ట్రాల నుంచి అక్రమంగా తరలిస్తున్నట్టు విచారణలో తేలింది. ఎలాంటి వైద్య పర్యవేక్షణ నిబంధనలు పాటించకుండా ఈ మహిళలకు ప్రమాదకరమైన హార్మోన్ ఇంజెక్షన్లు ఇచ్చినట్టు అధికారులు గుర్తించారు.

ఈ ఘటనపై కేసు నమోదు చేసిన అధికారులు దర్యాప్తు కొనసాగిస్తున్నట్టు తెలుస్తోంది.