మంత్రి దామోదర రాజా నరసింహ ఫుడ్ సేఫ్టీ, డ్రగ్ కంట్రోల్ శాఖల పనితీరు సమీక్ష

తెలంగాణ ఆరోగ్య శాఖ మంత్రి దామోదర రాజా నరసింహ హైదరాబాద్ సచివాలయంలో ఫుడ్ సేఫ్టీ, డ్రగ్ కంట్రోల్ విభాగాల ఉన్నతాధికారులతో సమావేశం నిర్వహించారు. ఈ సందర్భంగా ఆయన రెండు శాఖల పనితీరు సంతృప్తికరంగా ఉందని పేర్కొంటూ, ప్రజలకు నాణ్యమైన ఆహారం, మందులు అందించేందుకు పక్కాగా పనిచేయాలని సూచించారు.

నాణ్యమైన ఆహారం అందిస్తున్న హోటళ్లు, రెస్టారెంట్లను ఎట్టి పరిస్థితుల్లోనూ ఇబ్బంది పెట్టవద్దని ఆదేశించారు. అదే సమయంలో, ఆహార పరిశ్రమను రక్షించుకోవాల్సిన బాధ్యత ప్రభుత్వంపై ఉందని గుర్తు చేశారు.

ఫార్మా, వ్యాక్సిన్ తయారీ రంగంలో హైదరాబాద్ అంతర్జాతీయ స్థాయిలో గుర్తింపు పొందిందని తెలిపిన మంత్రి, ఈ బ్రాండ్‌ను మరింత విస్తరించేందుకు 'గుడ్ మానుఫ్యాక్చరింగ్ ప్రాక్టీసెస్'ను ప్రోత్సహించాలని అధికారులకు సూచించారు.

ఇటీవల వివిధ రాష్ట్రాల్లో పర్యటించిన ఫుడ్ సేఫ్టీ కమిషనర్ సంగీత సత్యనారాయణ, ఆయా రాష్ట్రాల్లో అమలవుతున్న ఉత్తమ విధానాలను మంత్రికి వివరించారు. ఆరోగ్య శాఖ ప్రిన్సిపల్ సెక్రెటరీ క్రిస్టినా సహా పలువురు ఉన్నతాధికారులు ఈ సమావేశంలో పాల్గొన్నారు.