తెలంగాణ వైద్య వ్యవస్థ బలోపేతం: నియోజకవర్గాల వారీగా మంత్రి దామోదర సమీక్ష

తెలంగాణ వైద్యారోగ్య శాఖ మంత్రి దామోదర రాజ నరసింహ రాష్ట్ర వ్యాప్తంగా ఐదంచల వైద్య విధానాన్ని బలోపేతం చేసేందుకు నియోజకవర్గాల వారీగా సమీక్షలు నిర్వహిస్తున్నారు.

ప్రతి నియోజకవర్గానికి చెందిన ఎమ్మెల్యేలు, DMHO లతో కలిసి ఆస్పత్రుల స్థితిగతులను చర్చిస్తున్నారు. ఇప్పటికే నిజామాబాద్, వరంగల్, ఆదిలాబాద్ జిల్లాలకు సంబంధించిన సమావేశాలు పూర్తయ్యాయి.

వరంగల్‌లో నిర్మిస్తున్న హెల్త్ సిటీలోని సూపర్ స్పెషాలిటీ హాస్పిటల్‌ను ఈ ఏడాది చివరి నాటికి ప్రారంభించాలని నిర్ణయించారు. అదే ప్రాంతంలో క్యాన్సర్ చికిత్స కేంద్రం, IVF సేవలు, ఫుడ్ టెస్టింగ్ ల్యాబ్ కూడా ఏర్పాటు చేయనున్నారు.

ఆదిలాబాద్ ITDA పరిధిలోని ఏరియా హాస్పిటల్‌లో దశల వారీగా CT స్కాన్ సేవలు ప్రవేశపెట్టాలని నిర్ణయించారు. జగిత్యాలలో కొత్త హాస్పిటల్ నిర్మాణం త్వరలో పూర్తి కానుంది, మెడికల్ కాలేజ్ కు సూపర్ స్పెషాలిటీ సీట్ల కోసం NMC కి దరఖాస్తు చేయాలని ఆదేశించారు. నిజామాబాద్ ప్రభుత్వ ఆస్పత్రిని రిఫరల్ సెంటర్‌గా మార్చనున్నారు. చౌటుప్పల్‌లో కొత్త ఆస్పత్రి వచ్చే నెల ప్రారంభం కానుంది.

ప్రభుత్వ ఆసుపత్రులను బలోపేతం చేయడం, డయాలసిస్ కేంద్రాలు, CT స్కాన్, క్యాన్సర్ చికిత్స వంటి సేవలు మారుమూల ప్రాంతాలకు అందించాలన్న లక్ష్యంతో ఈ సమీక్షలు సాగుతున్నాయి.