హైదరాబాద్‌లో జ్యోతిరావ్ పూలే, సావిత్రిబాయి ఫూలే విగ్రహాలు: సీఎం రేవంత్ రెడ్డి 14న ఆవిష్కరించనున్నారు

ఖైరతాబాద్ ఎమ్మెల్యే దానం నాగేందర్, హైదరాబాద్‌లోని ఐమాక్స్ ఎదురుగా ఉన్న HMDA పార్కులో జ్యోతిరావ్ పూలే, సావిత్రిబాయి పూలేల కాంస్య విగ్రహాల ఏర్పాటు పనులను పరిశీలించారు. ఈ విగ్రహాలను ముఖ్యమంత్రి రేవంత్ రెడ్డి ఈ నెల 14న ఆవిష్కరించనున్నట్లు ఎమ్మెల్యే తెలిపారు.

పూలే దంపతుల విగ్రహాల ఏర్పాటుకు బడుగు, బలహీన వర్గాల నుంచి దీర్ఘకాలంగా డిమాండ్ ఉండేది. ఇప్పుడు దానిని నెరవేర్చుతున్నామని దానం నాగేందర్ అన్నారు. సావిత్రిబాయి పూలే భారతదేశంలో మొదటి మహిళా ఉపాధ్యాయురాలిగా మహిళా విద్యకు విశేష కృషి చేశారు. జ్యోతిరావ్ పూలే ఆశయాలను సీఎం రేవంత్ రెడ్డి అనుసరిస్తున్నారని ఎమ్మెల్యే పేర్కొన్నారు.

రాష్ట్రవ్యాప్తంగా ఇంటిగ్రేటెడ్ పాఠశాలల ఏర్పాటు ద్వారా తెలంగాణను దేశానికి ఆదర్శంగా నిలపడానికి ప్రభుత్వం కృతనిశ్చయంతో ఉందని ఆయన చెప్పారు. ఈ కార్యక్రమానికి ప్రజలు పెద్ద సంఖ్యలో హాజరై విజయవంతం చేయాలని కోరారు.