తండ్రి వదిలేసిన పిల్లలు: తల్లి మృతదేహంతో నార్కెట్పల్లి రోడ్డుపై ఆందోళన

నల్గొండ జిల్లా దామరచెర్లలో లక్ష్మి అనే మహిళ అనారోగ్యంతో మృతి చెందారు. ఆమె భర్త శ్రీకాంత్ మృతదేహాన్ని చూసేందుకు కూడా రాలేదు.

దీంతో లక్ష్మి కుమార్తెలు తల్లి మృతదేహంతో అద్దంకి-నార్కెట్పల్లి రహదారిపై రోడ్డుపైకి వచ్చారు. న్యాయం జరిగే వరకు కదలమని కుటుంబ సభ్యులు, బంధువులు రోడ్డుపై కూర్చున్నారు. ఈ ఆందోళన వల్ల రహదారిపై ఇరువైపులా కిలోమీటర్ల మేర వాహనాలు నిలిచిపోయాయి.

గత కొంతకాలంగా శ్రీకాంత్ భార్యాపిల్లలను వదిలి దూరంగా ఉన్నారు. విడాకుల కోసం కోర్టును కూడా ఆశ్రయించారు. తల్లి మరణంతో పిల్లలు పూర్తిగా ఒంటరిగా మిగిలిపోయారు.

వాడపల్లి SI బాధిత కుమార్తెలతో మాట్లాడారు. శ్రీకాంత్ పై చట్టపరంగా చర్యలు తీసుకుంటామని, పిల్లలకు న్యాయం జరిగేలా చూస్తామని SI హామీ ఇచ్చారు. తండ్రిని తీసుకొచ్చి న్యాయం చేయాలని మృతురాలి కుమార్తెలు విజ్ఞప్తి చేశారు.