హైదరాబాద్‌లో మూసీ నదీ తీర అభివృద్ధికి రక్షణ భూమి బదిలీ; బాపు ఘాట్‌కు కేంద్రం ఆమోదం

హైదరాబాద్‌లో మూసీ నదీ తీర అభివృద్ధి ప్రాజెక్టులో భాగంగా బాపు ఘాట్ అభివృద్ధికి కేంద్ర రక్షణ శాఖ ఆమోదం తెలిపింది. 533 కోట్ల రూపాయల విలువైన 83.814 ఎకరాల రక్షణ భూమిని బదిలీ చేస్తూ శుక్రవారం ఉత్తర్వులు జారీ చేసింది.

గోల్కొండ ఆర్టిలరీ సెంటర్ పరిధిలోని ఈ భూమిని నాలుగు ప్యాకేజీలకు కేటాయించింది. ఈ భూమిలో బాపు ఘాట్‌ను అంతర్జాతీయ స్థాయి 'గాంధీ సరోవర్' ప్రాజెక్ట్‌గా అభివృద్ధి చేయనున్నట్లు మూసీ రివర్ ఫ్రంట్ డెవలప్‌మెంట్ కార్పొరేషన్ తెలిపింది.

ఈ భూమి బదిలీ కోసం రాష్ట్ర ప్రభుత్వం చాలా రోజులుగా వినతులు చేస్తోంది. ముఖ్యమంత్రి రేవంత్ రెడ్డి కూడా రక్షణ శాఖను సంప్రదించారు. ఈ నేపథ్యంలో ఆమోదం లభించడంతో రాష్ట్ర ప్రభుత్వం వేరే ప్రాంతంలో భూమిని ప్రత్యామ్నాయంగా కేటాయించనుంది.

పర్యావరణ హితంగా మూసీ పరివాహక ప్రాంతాన్ని తీర్చిదిద్దే ప్రయత్నంలో ఇది కీలక ముందడుగని సీఎం రేవంత్ రెడ్డి అన్నారు. రక్షణ మంత్రికి, కేంద్ర ప్రభుత్వానికి కృతజ్ఞతలు తెలుపుతూ ఆయన ట్వీట్ చేశారు.