ఢిల్లీలో వాయు కాలుష్యం తీవ్రం: IIT Delhi వద్ద AQI 416

ఢిల్లీలో వాయు కాలుష్యం మళ్లీ తీవ్రంగా మారింది. నగరంలోని పలు ప్రాంతాల్లో వాయు నాణ్యత సూచి (AQI) 300 దాటి నమోదవుతోంది. IIT Delhi వద్ద AQI 416గా నమోదైంది.

జాఫర్‌పూర్‌లో AQI 404, Delhi University వద్ద 372, ఆనంద విహార్‌లో 319గా ఉంది. తెల్లవారుజామున పొగమంచు దట్టంగా కమ్ముకోవడంతో రహదారులపై విజిబిలిటీ భారీగా తగ్గింది.

దీపావళి ముగిసినా కాలుష్యం తగ్గడం లేదు. దీనికి పంజాబ్, హర్యాణాల్లో పంట వ్యర్థాల దహనమే ప్రధాన కారణమని నిపుణులు చెబుతున్నారు. దహనాన్ని అరికట్టేందుకు పంజాబ్ ప్రభుత్వం కట్టుదిట్టమైన నిఘా ఉంచుతోంది. భారీ జరిమానాలు విధిస్తున్నా పరిస్థితిలో మార్పు రావడం లేదు. ఢిల్లీలో సాధారణంగా అక్టోబర్-నవంబర్ నెలల్లో కాలుష్యం తీవ్రమవుతుంది.

అధికారిక గణాంకాల ప్రకారం ఈ ఏడాది సెప్టెంబర్ 15 నుంచి నవంబర్ 9 మధ్య పంజాబ్ వ్యాప్తంగా 4,657 పంట వ్యర్థాల దహన ఘటనలు నమోదయ్యాయి. పర్యావరణ నష్ట పరిహారం కింద సుమారు ₹80 లక్షల జరిమానాలు విధించారు. ఇందులో ఇప్పటివరకు ₹36 లక్షలు వసూలు చేశారు.