ఢిల్లీలో భారీ వర్షాలు: 16 ఏళ్ల రికార్డు, రోడ్లు జలమయం, ఐఎండి ఎల్లో అలర్ట్

భారీ వర్షాలు దేశ రాజధాని ఢిల్లీలో బీభత్సం సృష్టించాయి. నాలుగు రోజులుగా ఎడతెరిపి లేకుండా కురుస్తున్న వర్షాలతో పలు ప్రాంతాలు జలమయమయ్యాయి. ఆగస్ట్ మొదటి వారంలో నమోదైన వర్షపాతం గత 16 ఏళ్ల రికార్డును బద్దలుకొట్టింది.

సఫ్దర్జంగ్ వాతావరణ కేంద్రంలో ఏడు రోజుల్లో 127 మిల్లీమీటర్ల వర్షపాతం నమోదైంది. ఈ నెల మొదటి వారంలో ఇదే అత్యధికమని ఐఎండి తెలిపింది. గత 12 గంటల వ్యవధిలో 77.1 మిల్లీమీటర్ల వర్షం కురిసింది. భారీ వర్షాల కారణంగా ఢిల్లీకి ఐఎండి ఎల్లో అలర్ట్ జారీ చేసింది.

దక్షిణ ఢిల్లీలోని మెహరౌలి-బదర్పూర్ రోడ్డుపై ఎయిర్ ఫోర్స్ స్టేషన్ సమీపంలో నాలుగు అడుగుల మేర నీరు నిలిచిపోవడంతో వాహనాలు చిక్కుకుపోయాయి. డీఎన్డీ ఫ్లైవేపై రెండు గంటల పాటు ట్రాఫిక్ స్తంభించింది. ఎంబీ రోడ్డు, ఓక్లా అండర్ పాస్ జలమయంగా మారాయి. గురుగ్రాంలోనూ తీవ్రమైన ట్రాఫిక్ జామ్ ఏర్పడింది.

భారీ వర్షాలకు 16 చెట్లు కూలిపోగా, తొమ్మిది ఇళ్ల గోడలు కూలిపోయాయి. ఒక ఇంటిపై చెట్టు కూలడంతో లోపల చిక్కుకున్న ముగ్గురు మహిళలను అగ్నిమాపక సిబ్బంది రక్షించారు. ఎన్సీఆర్ పరిధిలోని నోయిడాలో అండర్ పాస్ లో అంబులెన్స్ అరగంటపాటు నీటిలో చిక్కుకుపోయింది. గురుగ్రాంలోని సివిల్ హాస్పిటల్ బేస్మెంట్ లోకి నీరు వచ్చి వైద్య సేవలు తాత్కాలికంగా నిలిపివేయబడ్డాయి.

ఢిల్లీలో ఇవాళ కూడా భారీ వర్షం కురుస్తుందని ఐఎండి హెచ్చరించింది. ప్రజలు అప్రమత్తంగా ఉండాలని సూచించింది.