ఢిల్లీ కొత్త ఈవీ పాలసీ: 2027 నుంచి పెట్రోల్ ఆటోల నమోదు నిషేధం; 2028 నుంచి బైక్‌లపైనా నిషేధం

ఢిల్లీ ప్రభుత్వం కొత్త ఈవీ (ఎలక్ట్రిక్ వెహికల్) పాలసీని ప్రకటించింది. దీని ప్రకారం, 2027 జనవరి 1 నుంచి కొత్త మూడు చక్రాల వాహనాల (ఆటోలు) నమోదును నిలిపివేస్తారు. 2028 జనవరి 1 నుంచి ద్విచక్ర వాహనాలకు కూడా పెట్రోల్, డీజిల్ మోడల్స్‌కు రిజిస్ట్రేషన్లు ఇవ్వరు.

అయితే, ఈవీ వాహనాలు కొనే వారికి పెద్ద మొత్తంలో ప్రోత్సాహకాలు ఇస్తారు. కొత్త చార్జింగ్ వాహనం కొనుగోలుపై తొలి ఏడాదిలో రూ.50,000, రెండో ఏడాదిలో రూ.40,000, మూడో ఏడాదిలో రూ.30,000 చొప్పున రోడ్డు పన్ను, రిజిస్ట్రేషన్ చార్జీలు వసూలు చేయబోమని ప్రకటించింది.

పాత పెట్రోల్/డీజిల్ వాహనాలను తొలగించి కొత్త ఈవీ కొనే వారికి స్క్రాపేజ్ బోనస్ కూడా ఇస్తారు. వాహనం పరిస్థితిని బట్టి రూ.10 వేల నుంచి రూ.లక్ష వరకు ఈ బోనస్ ఇవ్వనున్నారు.

ఛార్జింగ్ ఇన్ఫ్రాస్ట్రక్చర్ కోసం ఢిల్లీ నగరమంతా 23,000 చార్జింగ్ పాయింట్లు ఏర్పాటు చేస్తామని, ఈ కార్యక్రమానికి మొత్తం రూ.7,000 కోట్లు ఖర్చు చేయనున్నట్లు ప్రభుత్వం తెలిపింది. ఈ విధానం ద్వారా వాయు కాలుష్యం తగ్గుతుందని భావిస్తున్నారు.