చెక్ పవర్ రద్దు చేయొద్దని ఇందిరా పార్క్‌లో ఉప సర్పంచుల ధర్నా

హైదరాబాద్ ఇందిరా పార్క్ దగ్గర నేడు సుమారు 4 వేల మంది ఉప సర్పంచులు ధర్నా నిర్వహించారు. ఉప సర్పంచుల చెక్ పవర్ రద్దు చేస్తున్నారన్న వార్తలను ఖండిస్తూ వారు ఈ ఆందోళన చేపట్టారు.

తమ చెక్ పవర్ ను రద్దు చేయవద్దని, ఉప సర్పంచులకు గౌరవ వేతనంగా 5 వేల రూపాయలు, వార్డు మెంబర్లకు 3 వేల రూపాయలు చెల్లించాలని వారు డిమాండ్ చేశారు. శిలాఫలకాలపై సర్పంచ్ పేరుతో పాటు ఉప సర్పంచ్, వార్డు సభ్యుల పేర్లు కూడా ఉండాలని, స్టాండింగ్ కమిటీలలో వైస్ చైర్మన్లుగా ఉప సర్పంచులను నియమించాలని కోరారు. తీర్మానాలపై సంతకం చేసే అధికారం కూడా కల్పించాలన్నారు.

గత 20 రోజులుగా తమ డిమాండ్లపై 70-80 మంది ఎమ్మెల్యేలు, 10 మంది మంత్రులను కలిశామని, కానీ సానుకూల స్పందన లభించలేదని నిరసనకారులు తెలిపారు. తమ డిమాండ్లు నెరవేరకపోతే సచివాలయం వరకు మార్చ్ చేపడతామని హెచ్చరించారు. ప్రభుత్వం నుండి ఈ విషయంపై స్పందన రాలేదు.