డీజీపీ సీవీ ఆనంద్ వరంగల్‌లో మూడు రోజుల పర్యటన – కొత్త పోలీసింగ్ సంస్కరణల దిశగా అడుగులు

తెలంగాణ డీజీపీ సీవీ ఆనంద్ ఉమ్మడి వరంగల్ జిల్లాలో మూడు రోజుల పర్యటన మొదలుపెట్టారు. ఈ పర్యటనలో పోలీసింగ్‌లో కొత్త సంస్కరణలకు శ్రీకారం చుట్టనున్నట్లు చెప్పారు.

నిన్న సాయంత్రం మామునూరులోని నాలుగో బెటాలియన్‌కు చేరుకున్న డీజీపీ, అక్కడి అధికారులు, సిబ్బందితో సమావేశమయ్యారు. వృత్తి నైపుణ్యం, విధి నిర్వహణలో మెరుగుదలపై పలు సూచనలు చేశారు. ఎన్‌డీఆర్‌ఎఫ్ సిబ్బంది ఏర్పాటు చేసిన ప్రదర్శనను తిలకించి, వారి పనితీరుపై చర్చించారు.

ఈ రోజు ఉదయం వరంగల్ పోలీస్ కమిషనరేట్ కార్యాలయానికి చేరుకుని, తర్వాత నిట్ వరంగల్ ప్రాంగణానికి వెళ్లారు. అక్కడ అధికారులతో కొత్త కార్యక్రమాలు, ప్రజలకు మరింత చేరువయ్యే పోలీసింగ్ విధానంపై చర్చిస్తున్నారు.

మధ్యాహ్నం 12:30 గంటలకు మీడియా సమావేశం నిర్వహించనున్నారు. అనంతరం భూపాలపల్లి, ములుగు జిల్లాలకు వెళతారు. రేపు తెలంగాణ-ఛత్తీస్‌గఢ్ సరిహద్దులోని కర్రగుట్టలో పోలీస్ బేస్ క్యాంపుల పనులను పరిశీలిస్తారు. లక్నవరం ప్రాంతంలోని అభివృద్ధి కార్యక్రమాలను కూడా చూస్తారు.