డీజీపీ సీవీ ఆనంద్ హెచ్చరిక: పనితీరు మార్చుకోని 3-4 అధికారులపై చర్యలు

తెలంగాణ డీజీపీ సీవీ ఆనంద్ కొందరు పోలీస్ అధికారుల పనితీరుపై అసంతృప్తి వ్యక్తం చేశారు. ఎంత చెప్పినా మార్పు రాని 3-4 అధికారులను గుర్తించామని, వారిపై విభాగపరమైన చర్యలు తీసుకుంటామని ఆయన హెచ్చరించారు.

హనుమకొండలో మీడియా సమావేశంలో మాట్లాడుతూ, ఇప్పటికే పలుమార్లు వీడియో కాన్ఫరెన్స్ ద్వారా సూచనలు ఇచ్చినా ఆ అధికారుల ప్రవర్తనలో మార్పు రాలేదని డీజీపీ తెలిపారు. వారికి మరో అవకాశం ఇస్తున్నామని, ఇప్పటికీ మెరుగుపడకపోతే కఠిన చర్యలు తప్పవని చెప్పారు.

నేరాల స్వరూపం మారిందని, సైబర్ నేరాలు పెరుగుతుండగా నక్సలిజం తగ్గిందని డీజీపీ గుర్తు చేశారు. పోలీసులు కూడా నేర పరిశోధనలో అప్‌డేట్ కావాల్సిన అవసరం ఉందన్నారు. అవినీతి ఆరోపణలు ఎదుర్కొంటున్న అధికారులపై కూడా కఠినంగా వ్యవహరిస్తామని హెచ్చరించారు.

మావోయిస్టు ప్రభావిత ప్రాంతాల్లో పనిచేసిన అధికారులకు ఇచ్చిన గన్‌మెన్ సేవలను తొలగించిన విషయాన్ని కూడా ఆయన ప్రస్తావించారు. ఈ వ్యాఖ్యలతో పోలీస్ శాఖలో ఆ ముగ్గురు, నలుగురు అధికారులు ఎవరనేది చర్చనీయాంశంగా మారింది.