ధరణి రైస్: 26 కిలోల సన్న బియ్యం బ్యాగ్ ₹1,300కే.. రైతు బజార్లలో కౌంటర్లు

ఆంధ్రప్రదేశ్ ప్రభుత్వం ధరణి పేరిట సన్న బియ్యం బ్యాగ్‌లను అమ్ముతోంది. 26 కిలోల బ్యాగ్ ధర ₹1,300. రైతు బజార్లలో ఈ కౌంటర్లను ఏర్పాటు చేశారు.

బియ్యం తీసుకోవాలంటే ఆధార్ కార్డు, మొబైల్ నంబర్ ఇవ్వాలి. సివిల్ సప్లై అధికారులు ఈ వివరాలు నమోదు చేసిన తర్వాతే బ్యాగ్ ఇస్తారు. ఒకే వ్యక్తి రోజూ వచ్చి 26 కిలోలు తీసుకోవడానికి వీల్లేదు. అలా చేస్తే నిజమైన లబ్ధిదారులకు బియ్యం అందకుండా పోతుందని అధికారులు చెప్తున్నారు.

రైతు బజార్లు లేని మండలాలు, గ్రామాలకు మొబైల్ వాహనాల ద్వారా బియ్యం అమ్ముతారు. ఆయా గ్రామాలకే వాహనాలు వెళ్లి బ్యాగ్‌లను ఇస్తాయి.

బియ్యం ధరలపై కూడా పరిమితి విధించారు. BPT స్టీమ్ రైస్ కిలో ₹66 దాటకూడదు. సాధారణ స్టీమ్ రైస్ కిలో ₹47 మించకూడదు. ఎక్కువ ధరకు అమ్మినట్టు ఫిర్యాదు వస్తే లైసెన్స్ రద్దు లేదా జరిమానా విధిస్తారు.

నిత్యావసర వస్తువుల ధరలు నియంత్రణలో ఉండాలని ప్రభుత్వం భావిస్తోంది. కనీసం బియ్యం ధరలను పెంచకూడదని నిర్ణయించింది.

ధరణి బియ్యం తిరుపతి, కర్నూలు, కడప, నంద్యాల జిల్లాల నుంచి తెస్తున్నారు. ఈ బియ్యం రాష్ట్రం దాటి వెళ్లకుండా టోల్ గేట్ల వద్ద తనిఖీలు చేస్తున్నారు.