JNTU కూకట్‌పల్లి హాస్టల్ భోజనంలో బల్లి.. విద్యార్థుల ఆగ్రహం

కూకట్‌పల్లి JNTU హాస్టల్‌లో విద్యార్థులకు వడ్డించిన భోజనంలో బల్లి కనిపించింది. ఈ ఘటనపై విద్యార్థులు తీవ్ర ఆగ్రహం వ్యక్తం చేస్తున్నారు.

జేఎన్‌టీయూ మంజిరా హాస్టల్‌లో నిన్న రాత్రి డిన్నర్ సమయంలో ఈ ఘటన చోటు చేసుకుంది. వడ్డించిన కూరలో బల్లి కనిపించడంతో విద్యార్థులు భయాందోళనకు గురయ్యారు. దాదాపు 70 శాతం మంది విద్యార్థులు భోజనం చేసిన తర్వాత చివరి దశలో బల్లి కనిపించినట్లు సమాచారం. కొందరు విద్యార్థులు వెంటనే అప్రమత్తమై సెల్ ఫోన్‌లలో ఆ దృశ్యాలను వీడియో తీశారు.

మెస్ నిర్వాహకుల నిర్లక్ష్యంపై విద్యార్థులు మండిపడుతున్నారు. తమకు నాణ్యమైన భోజనం అందించాలని డిమాండ్ చేస్తున్నారు. హాస్టల్ నిర్వాహకులు, డైనింగ్ సిబ్బందిని ప్రశ్నించినా సమాధానం లభించలేదని విద్యార్థులు చెప్తున్నారు. ఫిర్యాదు చేసిన విద్యార్థులను టార్గెట్ చేసి ఇబ్బందులు పెడుతున్నారని వారు ఆరోపిస్తున్నారు.

ఇలాంటి సమస్య కొత్తది కాదని విద్యార్థి సంఘాలు చెప్తున్నాయి. గత రెండు, మూడు సంవత్సరాలుగా హాస్టల్ భోజన సమస్య పునరావృతమవుతోందని వారి ఆరోపణ. గతంలో విద్యార్థులు మెస్‌ను బహిష్కరించారు. పగిలిన మంచాలపై పడుకుంటున్నామని ఫిర్యాదు చేశారు. విద్యార్థి సంఘాల నేతలు ఏకమై వైస్ ఛాన్సలర్‌ను ప్రశ్నించిన సందర్భమూ ఉంది.

ఈ ఘటనపై యూనివర్సిటీ యాజమాన్యం స్పందన రావాల్సి ఉంది. హాస్టల్ భోజన నాణ్యతపై దర్యాప్తు, చర్యలు ఉంటాయా అనేది తదుపరి చూడాల్సిన అంశం.