నిజామాబాద్‌లో గ్రామస్థుల కృషితో ప్రభుత్వ పాఠశాల పునరుజ్జీవం

నిజామాబాద్ జిల్లా ధర్మోరలోని ప్రభుత్వ ప్రాథమిక పాఠశాల విద్యార్థుల సంఖ్య బాగా తగ్గి, వెలవెలబోయింది. గత సంవత్సరం 18 మంది మాత్రమే చదివిన ఈ పాఠశాలకు ఇప్పుడు 70 మందికి పైగా విద్యార్థులు హాజరవుతున్నారు.

గ్రామ పెద్దలు, పంచాయతీ, ఉపాధ్యాయులు కలిసి పాఠశాలకు కొత్త ఊపిరి అందించేందుకు సంయుక్తంగా కృషి చేశారు. 'బడిబాట' పేరుతో ఇంటింటికీ తిరిగి, తల్లిదండ్రులను కలిసి, తమ స్థానిక పాఠశాలలోనే పిల్లల్ని చేర్పించాలని ఒప్పించారు.

గ్రామ సర్పంచ్ శ్రీనివాస్ తన కుమార్తెను అదే పాఠశాలలో చేర్పించడం విశేషం. దాంతో ఈ పాఠశాలపై పెద్దల నమ్మకం పెరిగింది. ఉపాధ్యాయులు ఈ ఏడాది పూర్తి స్థాయిలో ఇంగ్లీష్ మీడియం ప్రారంభించారు. ఇది ప్రైవేట్ స్కూళ్లతో సమానంగా నాణ్యమైన విద్య అందించగలమని తల్లిదండ్రులకు భరోసా కల్పించింది.

ఫలితంగా 55 మందికి పైగా విద్యార్థులు ప్రైవేట్ స్కూళ్ల నుంచి ఈ ప్రభుత్వ పాఠశాలలో అడ్మిషన్ తీసుకున్నారు. మొత్తం స్ట్రెంత్ ఇప్పుడు 70 దాటింది. గ్రామస్థులు తాము ప్రైవేట్ స్కూళ్లకు ఇచ్చే ఫీజు నుంచి ఆదా అయిన డబ్బుతో పాఠశాలకు ప్రత్యేక నిధి ఏర్పాటు చేశారు. ఆయాలు వాలంటీర్లకు జీతాలు కూడా గ్రామస్థులే చెల్లిస్తున్నారు.

ప్రభుత్వ నిధులు రాకపోయినా గ్రామం ఒక్కటై ఊరి బడిని సంరక్షించుకుంటోంది. ధర్మోర పంచాయతీ, ఉపాధ్యాయులు ఇప్పుడు విద్యార్థుల సంఖ్య మరింత పెంచాలని లక్ష్యంగా పని చేస్తున్నారు.