E20 పెట్రోల్ వల్ల ఇంజన్ డ్యామేజ్ అవుతుందా? కేంద్రం ఏం చెప్పింది?

దేశంలో E20 ఇంధనంపై వస్తున్న వార్తలు పూర్తిగా అవాస్తవమని కేంద్ర పెట్రోలియం సహజ వాయు మంత్రిత్వ శాఖ స్పష్టం చేసింది. ఈ ఇంధనంపై వ్యాప్తి చెందుతున్న అపోహలను తీవ్రంగా ఖండించింది. శాస్త్రీయ ఆధారాలు లేని తప్పుడు ప్రచారమని పేర్కొంటూ పది ఉదాహరణలతో వివరణ ఇచ్చింది.

E20 ఇంధనంలో 20% ఇథనాల్, 80% పెట్రోల్ ఉంటుందని కేంద్రం స్పష్టం చేసింది. ఇది శాస్త్రీయ అధ్యయనాలు, అంతర్జాతీయ ప్రమాణాలు, నియంత్రణ భద్రత ప్రమాణాల ఆధారంగా రుజువైనదని తెలియజేసింది.

ఒక లీటర్ ఇథనాల్ తయారీకి 10,000 లీటర్ల నీరు అవసరమవుతుందన్న ప్రచారాన్ని కేంద్రం తోసిపుచ్చింది. ఇథనాల్ డిస్టిలరీలో లీటర్‌కు మూడు నుండి అయిదు లీటర్ల నీరు మాత్రమే వినియోగమవుతుందని వివరించింది. అనేక యూనిట్లు జీరో లిక్విడ్ డిస్చార్జ్ విధానాన్ని అనుసరిస్తున్నాయని తెలిపింది.

మొక్కజొన్న పంటల్లో 40% ఇథనాల్ ఉంటుందని, వరితో పోలిస్తే మొక్కజొన్నకు తక్కువ నీరు అవసరమవుతుందని కేంద్రం వివరించింది. అమెరికా, బ్రెజిల్, కెనడా, థాయిలాండ్, జపాన్, యూరప్ దేశాల్లో ఇప్పటికే ఈ ఇంధనాన్ని దీర్ఘకాలికంగా వాడుతున్నారని స్పష్టం చేసింది.

E20 ఇంధనం వాడటం వల్ల వాహనాలు పాడవుతున్నాయన్న భ్రమను వీడాలని కేంద్రం పేర్కొంది. ఆటోమోటివ్ రీసెర్చ్ అసోసియేషన్ ఆఫ్ ఇండియా నిర్వహించిన పరీక్షల్లో కార్లపై 40,000 కిలోమీటర్లు, టూ వీలర్లపై 20,000 కిలోమీటర్ల వరకు పరీక్షలు జరిగాయని తెలిపింది. వాహన పనితీరులో పెద్దగా సమస్యలు రాలేదని, కేవలం స్వల్పమైన మైలేజ్ మార్పులు మాత్రమే ఉన్నాయని వివరించింది. ఇంజన్ నష్టం ఆరోపణలు పూర్తిగా అవాస్తవమని తేల్చిచెప్పింది.

E20 వాడితే వారంటీ లేదా ఇన్సూరెన్స్ రద్దవుతుందన్న వాదనను కూడా కేంద్రం ఖండించింది. తయారీదారులు, ఇన్సూరెన్స్ సంస్థలు దీనిపై ఎలాంటి ప్రత్యేక నిబంధనలు పెట్టలేదని స్పష్టం చేసింది. ఇవన్నీ సోషల్ మీడియాలో వస్తున్న తప్పుడు వాదనలని కేంద్రం తెలిపింది.

ఇథనాల్‌లో చక్కెర ఉండడం వల్ల చీమలు, తేనెటీగలు ఆకర్షితమవుతాయన్న పోస్ట్‌లు సోషల్ మీడియాలో వైరల్ అవుతున్నాయి. దీన్ని కేంద్రం పూర్తిగా తప్పుడు సమాచారంగా పేర్కొంది. ఫ్యూయల్ గ్రేడ్ ఇథనాల్‌లో చక్కెర ఉండదని స్పష్టత ఇచ్చింది.

ఆధునిక వాహనాల్లో పెట్రోల్ ట్యాంకులోకి నీరు చేరకుండా ప్రత్యేక ఫిల్టర్ వ్యవస్థ ఉంటుందని కేంద్రం తెలిపింది. పర్యావరణంపై తీవ్ర ప్రభావం ఉంటుందన్న వాదనలను తోసిపుచ్చింది. ఇథనాల్ ఉత్పత్తి యూనిట్లు పర్యావరణ అనుమతులు పొందాల్సి ఉంటుందని, జీరో లిక్విడ్ డిస్చార్జ్ తప్పనిసరని తెలిపింది.

ఈ కార్యక్రమం ద్వారా ఇప్పటివరకు 1.9 లక్షల కోట్ల రూపాయల విదేశీ మారక ద్రవ్యం పొదుపు అయినట్లు కేంద్రం వెల్లడించింది. చెరుకు, మొక్కజొన్న వ్యర్థాలను రైతుల నుండి సేకరించడం ద్వారా 1.6 లక్షల కోట్ల రూపాయలకు పైగా చెల్లింపులు జరిగాయని తెలిపింది. సుమారు 930 లక్షల మెట్రిక్ టన్నుల కార్బన్ డైఆక్సైడ్ ఉద్గారాలు తగ్గాయని, 310 లక్షల మెట్రిక్ టన్నుల క్రూడ్ ఆయిల్ దిగుమతులు తగ్గాయని వెల్లడించింది.

డిసెంబర్ 2025 నాటికే భారత్ 20% ఇథనాల్ మిశ్రమ లక్ష్యాన్ని ముందుగానే సాధించిందని కేంద్రం తెలిపింది. 2013-14లో ఇది కేవలం 1.5% మాత్రమే ఉండేదని గుర్తు చేసింది. ప్రస్తుతం దేశంలో ఇథనాల్ ఉత్పత్తి సామర్థ్యం సుమారు 2,000 కోట్ల లీటర్లకు చేరిందని అధికారిక లెక్కలు వెల్లడించాయి.