కూర్చుని చేసే ఉద్యోగాలతో గుండె, మెదడు స్ట్రోక్‌ల ముప్పు: డాక్టర్ గోపీకృష్ణ హెచ్చరిక

ప్రస్తుతం ఉద్యోగాలు ఎక్కువగా కూర్చుని చేసేవిగా మారిపోయాయి. ఈ మార్పు వల్ల గుండె, మెదడుకు సంబంధించిన స్ట్రోక్‌లు వచ్చే ప్రమాదం పెరిగిందని ప్రముఖ వైద్యుడు డాక్టర్ గోపీకృష్ణ హెచ్చరించారు.

ఇంతకుముందు ఎక్కువ మంది వ్యవసాయం చేసేవారు. శారీరక శ్రమ ఎక్కువగా ఉండటంతో ఫుడ్ బాగా జీర్ణమయ్యేది. ఇప్పుడు ఆఫీసుల్లో కూర్చుని పని చేస్తున్నారు. శారీరక శ్రమ తగ్గిపోయింది. ఫలితంగా తిన్న ఆహారం నుంచి అదనపు కేలరీలు ఫ్యాట్‌గా మారి రక్తనాళాల్లో పేరుకుపోతాయని డాక్టర్ గోపీకృష్ణ వివరించారు.

ఈ ఫ్యాట్ గుండె, మెదడు, కాళ్లకు రక్తం సరఫరా చేసే నాళాల్లో చేరడం వల్ల స్ట్రోక్‌లు, గ్యాంగ్రీన్ వంటి సమస్యలు వస్తాయి. ఒబేసిటీ కూడా పెద్ద సమస్యగా మారింది. బరువు పెరగడం వల్ల అబ్స్ట్రాక్టివ్ స్లీప్ అప్నియా వస్తుంది. దీని వల్ల బీపీ పెరిగి, హార్ట్ ఎటాక్స్ వచ్చే అవకాశం పెరుగుతుందని తెలిపారు.

ఒబేసిటీ వల్ల కణజాలంలో కొవ్వు పేరుకుపోవడంతో ఇన్సులిన్ రెసిస్టెన్స్ ఏర్పడుతుంది. ఇన్సులిన్ సరిగా పని చేయకపోతే రక్తంలో గ్లూకోజ్ లెవెల్స్ పెరిగి డయాబెటీస్, నీరసం వంటి సమస్యలు రావచ్చని డాక్టర్ గోపీకృష్ణ హెచ్చరించారు.