నల్గొండలో స్వయం సహాయక సంఘాల మహిళలకు డ్రోన్ శిక్షణ

నల్గొండ జిల్లాలో స్వయం సహాయక సంఘాల (SHG) మహిళలకు డ్రోన్ నిర్వహణ శిక్షణ అందిస్తున్నారు. పంటలకు పురుగు మందులు, ఎరువులు పిచికారి చేసేందుకు ఆధునిక డ్రోన్ టెక్నాలజీని అందిపుచ్చుకునేలా ఈ శిక్షణ రూపొందించారు. ప్రతి మండలం నుంచి ఇద్దరు నుంచి ముగ్గురు మహిళలను ఎంపిక చేసి 10 రోజుల పాటు శిక్షణ ఇస్తున్నారు. ఉదయం 10 నుంచి మధ్యాహ్నం 1 గంట వరకు, భోజనం తర్వాత సాయంత్రం 5 గంటల వరకు ప్రాక్టికల్ సెషన్లు నిర్వహిస్తున్నారు.

ఈ శిక్షణలో డ్రోన్ను ఎలా స్టార్ట్ చేయాలి, ఎలా ఎగరేయాలి, పొలంలో ఎలా పిచికారి చేయాలి అనే అంశాలపై హ్యాండ్స్ ఆన్ ట్రైనింగ్ ఇస్తున్నారు. శిక్షణకు ముందు మహిళలు డ్రోన్ వాడకంపై అవగాహన లేకపోయినా, ఒకరోజు శిక్షణలో పాల్గొన్న తర్వాత వారిలో ఆసక్తి పెరిగింది. ఇప్పుడు రోజూ ఉత్సాహంగా హాజరవుతున్నారు.

సంప్రదాయ పద్ధతిలో భుజానికి పంపు వేసుకుని పొలంలో దిగి పిచికారి చేయడం శ్రమతో కూడుకున్న పని. డ్రోన్ వాడకం వల్ల ఈ శ్రమ తప్పడంతో పాటు సమయం కూడా ఆదా అవుతుంది. బురద పొలంలో దిగాల్సిన అవసరం లేదు. వరిమడిలో నిలబడి కూడా డ్రోన్ రిమోట్ ద్వారా పొలమంతా తిరిగి పిచికారి చేయవచ్చు.

శిక్షణ పూర్తయిన తర్వాత మహిళలు డ్రోన్లు కొనుగోలు చేసేందుకు ప్రభుత్వం ఆర్థిక సౌకర్యం కల్పిస్తోంది. పిఎంజపి పథకం కింద రూ.10 లక్షల వరకు రుణం ఇస్తారు. ఈ రుణంపై 35 శాతం రాయితీ లభిస్తుంది. డ్రోన్ సొంతం చేసుకున్న తర్వాత తమ పొలాలతో పాటు పక్క రైతుల పొలాల్లో కూడా అద్దెకు పిచికారి చేసి ఆదాయం సంపాదించవచ్చు.