ఆఫ్ఘానిస్తాన్‌లో 6.2 తీవ్రత భూకంపం; జమ్మూ, ఢిల్లీ సహా భారత్‌లో ప్రకంపనలు

ఆఫ్గానిస్తాన్‌లోని హిందూకుష్ ప్రాంతంలో 6.2 తీవ్రతతో భూకంపం సంభవించింది. భూకంప కేంద్రం జర్మ్ పట్టణానికి దక్షిణంగా 43 కిలోమీటర్ల దూరంలో, 215 కిలోమీటర్ల లోతులో ఉన్నట్లు అమెరికా జియోలాజికల్ సర్వే (USGS) తెలిపింది.

ఈ భూకంప ప్రభావంతో భారతదేశంలోని జమ్మూ కాశ్మీర్, ఢిల్లీ, హిమాచల్ ప్రదేశ్, పంజాబ్, హర్యానా రాష్ట్రాల్లో ప్రకంపనలు ఏర్పడ్డాయి. పాకిస్తాన్, చైనా, తజికిస్తాన్, ఉజ్బెకిస్తాన్, కిర్జికిస్తాన్ లాంటి దేశాల్లోనూ భూమి కంపించినట్లు నివేదికలు ఉన్నాయి.

ప్రాథమిక సమాచారం ప్రకారం, ఎక్కడా ప్రాణ, ఆస్తి నష్టం జరగలేదు. శ్రీనగర్‌లో ప్రజలు భయంతో ఇళ్ల నుంచి బయటకు పరుగులు తీశారు. నేషనల్ సెంటర్ ఫర్ సిస్మాలజీ ఈ భూకంపం తీవ్రతను ధృవీకరించింది.

భూకంపం 215 కిలోమీటర్ల లోతులో ఉండటంతో ఉపరితలంపై దాని ప్రభావం తక్కువగా ఉందని నిపుణులు అంచనా వేశారు. అందువల్లే పెద్ద నష్టం జరగలేదు. అధికారులు ప్రజలను ఆందోళన చెందొద్దని సూచించారు.