హైదరాబాద్‌లో ED సీజ్ చేసిన ప్రైవేట్ జెట్ ₹3 కోట్లకు అమ్ముడు

హైదరాబాద్‌లో ఎన్ఫోర్స్‌మెంట్ డైరెక్టరేట్ (ED) సీజ్ చేసిన హాకర్ 800A లగ్జరీ బిజినెస్ జెట్ వేలంలో ₹3 కోట్లకు అమ్ముడయింది. దేశంలోనే తొలిసారి ED స్వాధీనం చేసుకున్న విమానాన్ని వేలం వేసి అమ్మిన ఘటన ఇదేనని అధికారులు తెలిపారు.

ఈ వేలం జూలై 1న ED హైదరాబాద్ జోనల్ కార్యాలయం MSTC ద్వారా నిర్వహించింది. మనీలాండరింగ్ నిరోధక చట్టం (PMLA) కింద నమోదైన కేసులో భాగంగా ఈ జెట్‌ను స్వాధీనం చేసుకున్నారు. 2025 మార్చి 7న రాజీవ్‌గాంధీ అంతర్జాతీయ విమానాశ్రయంలో ED అధికారులు దీన్ని సీజ్ చేశారు.

ఈ కేసు హైదరాబాద్‌కు చెందిన క్యాపిటల్ ప్రొటెక్షన్ ఫోర్స్ ప్రైవేట్ లిమిటెడ్ (ఫాల్కన్ గ్రూప్) అనే సంస్థకు సంబంధించింది. సంస్థ CMD అమర్దీప్ కుమార్ సహా పలువురిపై ఇన్‌వాయిస్ డిస్కౌంటింగ్ పేరుతో వేలాది మంది పెట్టుబడిదారుల నుంచి దాదాపు ₹792 కోట్లు వసూలు చేసిన ఆరోపణలున్నాయి. అయితే అలాంటి వ్యాపారమే జరగలేదని ED దర్యాప్తులో తేలింది.

ఈ కేసులో ఇప్పటికే పలువురిని అరెస్టు చేసి ఛార్జ్‌షీట్ దాఖలు చేశారు. నిందితుల అక్రమ ఆస్తులను జప్తు చేసే క్రమంలోనే ఈ జెట్‌ను కూడా స్వాధీనం చేసుకుని, న్యాయపరమైన అనుమతులతో వేలం వేశారు. వేలం ద్వారా వచ్చిన ₹3 కోట్లు ప్రభుత్వ ఖజానాకు కాకుండా, PMLA కోర్టు అనుమతితో నిజమైన బాధిత పెట్టుబడిదారులకు పరిహారం చెల్లించేందుకు ఉపయోగిస్తామని ED స్పష్టం చేసింది.