ఆదిలాబాద్‌లో ఎల్‌నినో ప్రభావం: వర్షాభావంతో పత్తి, సోయా పంటలు ఎండిపోతున్నాయి

ఆదిలాబాద్ జిల్లాలో ఎల్‌నినో ప్రభావంతో వర్షాభావం తీవ్రంగా కనిపిస్తోంది. వర్షాకాలం మొదలై దాదాపు నెలన్నర గడిచినా పూర్తి స్థాయి వర్షాలు కురవలేదు. ఫలితంగా పత్తి, సోయా పంటలు ఎండిపోతున్నాయి.

రైతులు ఇప్పటికే రెండుసార్లు విత్తనాలు నాటారు. మొదటిసారి నాటిన పంటలు మొలకెత్తినా వర్షం లేక ఎండిపోయాయి. రెండోసారి నాటిన మొక్కలు ఎదుగుదల దశలో ఉండగానే తేమ లేక ఎండిపోయే స్థితికి చేరుకున్నాయి. నల్లరేగడి నేలల్లో మాత్రమే కొద్దిపాటి ప్రాణం ఉన్నట్టు రైతులు చెబుతున్నారు.

వర్షం కోసం జిల్లా వ్యాప్తంగా గ్రామాలు, పట్టణాల్లో సంప్రదాయ పూజలు చేస్తున్నారు. కప్పతల్లి ఆట, పోచమ్మ తల్లికి బోనాలు, జలాభిషేకం వంటి కార్యక్రమాలు నిర్వహిస్తున్నారు. అగ్రి ఎంప్లాయిస్ అసోసియేషన్ ఆధ్వర్యంలో హనుమాన్ మందిరంలో అన్నదానం కూడా చేస్తున్నారు. సమృద్ధిగా వర్షాలు పడి రైతులు నష్టపోకుండా ఉండాలని వారు ప్రార్థిస్తున్నారు.