ఎల్‌నినో ప్రభావం: ఇక్రిసాట్ శాస్త్రవేత్తలతో తెలంగాణ వ్యవసాయ శాఖ మంత్రి సమీక్ష

తెలంగాణ వ్యవసాయ శాఖ మంత్రి తుమ్మల నాగేశ్వరరావు ఇక్రిసాట్ శాస్త్రవేత్తలతో సమీక్ష సమావేశం నిర్వహించారు. ఎల్‌నినో ప్రభావంతో ఈ ఏడాది వర్షాలు ఆలస్యమై తక్కువగా నమోదయ్యే అవకాశం ఉన్న నేపథ్యంలో ప్రత్యామ్నాయ పంటల ప్రణాళికలపై చర్చించారు.

రాష్ట్ర వ్యవసాయ విశ్వవిద్యాలయాలు, వాతావరణ నిపుణులు, ఉద్యానవన శాఖ అధికారులు కూడా ఈ సమావేశంలో పాల్గొన్నారు. సాధారణం కంటే తక్కువ వర్షపాతం నమోదయ్యే ప్రాంతాల్లో రైతులు తక్కువ నీటితో పండే పంటలను ఎంచుకోవాలని శాస్త్రవేత్తలు సూచించారు.

ఇక్రిసాట్ పరిశోధకులు జొన్న, సజ్జ, రాగి, కొర్రలు, సామలు వంటి చిరుధాన్యాలు, కంది, పెసర, మినుము వంటి పప్పు ధాన్యాలు, నువ్వులు, ఆముదం, వేరుశనగ వంటి నూనెగింజల పంటలకు ప్రాధాన్యం ఇవ్వాలని సిఫార్సు చేశారు. డ్రై ల్యాండ్ క్రాప్స్ పై ఇక్రిసాట్ దశాబ్దాల అనుభవం ఉందని, ప్రస్తుత పరిస్థితుల్లో ఇవి రైతులకు ఉపయుక్తంగా ఉంటాయని వారు తెలిపారు.

జులై 15 వరకు సాధారణ వర్షపాతం లేకపోతే జిల్లా, మండల స్థాయిలో ఇప్పటికే సిద్ధమైన యాక్షన్ ప్లాన్ ప్రకారం గ్రామసభలు, రైతు వేదికల ద్వారా రైతులకు ప్రత్యామ్నాయ పంటలపై అవగాహన కల్పిస్తామని అధికారులు తెలిపారు. ప్రతి వారం ఈ ప్రణాళికను సమీక్షించనున్నారు.

ముందస్తు శాస్త్రీయ ప్రణాళికలతో రైతులకు నష్టం జరగకుండా చూడడమే ప్రభుత్వ లక్ష్యమని మంత్రి ఈ సందర్భంగా స్పష్టం చేశారు.