తిరుమలలో జులై 17న ఆణివార ఆస్థానం: ఆర్జిత సేవలు, విఐపి బ్రేక్ దర్శనాలు రద్దు

తిరుమల శ్రీవారి ఆలయంలో జులై 17వ తేదీ శుక్రవారం ఆణివార ఆస్థానం కార్యక్రమం నిర్వహించనున్నారు. ఈ సందర్భంగా ఆ రోజు అన్ని ఆర్జిత సేవలు, సిఫారసు లేఖలపై జారీ చేసే విఐపి బ్రేక్ దర్శనాలను టీటీడీ రద్దు చేసింది.

ఆణివార ఆస్థానం గురించి శ్రీవారి ఆలయ ప్రధాన అర్చకులు వేణుగోపాల దీక్షితులు వివరిస్తూ, ఈ రోజున స్వామివారి మూలవిరాట్‌కు వజ్ర కిరీటం, కర్ణపత్రాలు, శంఖచక్రాలు, నాగాభరణాలు తదితర విశేష ఆభరణాలతో అలంకరిస్తారని తెలిపారు. బంగారు పీతాంబరం, మకరకంటి మూడు పేటల వజ్రాల హారం కూడా సమర్పిస్తారు. వడ, అప్పం, దోశ వంటి ప్రత్యేక నైవేద్యాలను కూడా సమర్పించడం జరుగుతుందని చెప్పారు.

ఆస్థానం అనంతరం మలయప్ప స్వామిని సర్వభూపాల వాహనంపై ఉంచి భక్తులకు దర్శనం కల్పిస్తారు. అప్పుడే స్వామివారి మూల విరాట్‌ను సాధారణ భక్తులు దర్శించుకుంటారు. ఈ ప్రత్యేక కార్యక్రమం వల్ల రద్దు చేసిన సేవలు మరుసటి రోజు నుంచి యథావిధిగా కొనసాగుతాయని టీటీడీ అధికారులు తెలిపారు.