తెలుగు రాష్ట్రాల్లో వర్షాలు లేక ఎండలు; ఎల్ నినో బలపడుతుందని హెచ్చరిక

తెలంగాణ, ఆంధ్రప్రదేశ్‌లో జూలైలోనూ ఎండలు కొనసాగుతున్నాయి. సాధారణ వర్షపాతం కంటే 25% లోటు నమోదైంది. ఎల్ నినో ప్రభావం వల్ల ఈ పరిస్థితి ఏర్పడిందని నిపుణులు అంటున్నారు.

తెలంగాణలో జూలై రెండవ వారంలో సాధారణం కంటే ఎక్కువ ఉష్ణోగ్రతలు నమోదవుతున్నాయి. మరో రెండు రోజులు ఉష్ణోగ్రతలు మరింత పెరిగే అవకాశం ఉందని వాతావరణ శాఖ తెలిపింది. ఏపీ కోస్తా జిల్లాల్లో వడగాలులు కొనసాగుతున్నాయి.

ఎల్ నినో బలపడుతుండటంతో సముద్రాల ఉష్ణోగ్రత పెరిగి గాలిలో తేమ ఎక్కువైంది. ఫలితంగా కొన్ని ప్రాంతాల్లో తీవ్ర కరువు, మరికొన్ని చోట్ల ఆకస్మిక భారీ వర్షాలు, వరదలు సంభవించే ప్రమాదం ఉందని వాతావరణ నిపుణులు హెచ్చరిస్తున్నారు.

గతంలో 2015-16లో సంభవించిన గాడ్జిల్లా ఎల్ నినో ప్రపంచవ్యాప్తంగా వాతావరణ రికార్డులు బద్దలుకొట్టింది. భారత్‌లో ఆ ఏడాది అత్యల్ప వర్షపాతం నమోదైంది. ఇప్పుడు కూడా అదే స్థాయిలో తీవ్రత పెరిగితే వ్యవసాయం, జలాశయాలు, తాగునీరు, విద్యుత్ ఉత్పత్తి, ఆహార ధరలపై తీవ్ర ప్రభావం పడే అవకాశం ఉందని నిపుణులు హెచ్చరిస్తున్నారు.

రైతులు వర్షాల కోసం ఎదురుచూస్తుండగా, పసిఫిక్ మహాసముద్రంలో మార్పులపై ప్రపంచం దృష్టి నిలిచింది. ఎల్ నినో మరింత బలపడితే రాబోయే నెలల్లో ప్రజల జీవితంపై పలు ప్రభావాలు ఉంటాయని నిపుణులు తెలిపారు.