ఎల్నినోతో వర్షాభావం: రైతులకు ప్రత్యామ్నాయ పంటలు, నీటి నిర్వహణ సూచనలు

ఎల్‌నినో ప్రభావంతో ఈ ఏడాది వర్షపాతం తక్కువగా ఉండొచ్చని వాతావరణ శాస్త్రవేత్తలు హెచ్చరిస్తున్నారు. ఈ నేపథ్యంలో లాం పరిశోధన కేంద్రం అదనపు సంచాలకులు దుర్గాప్రసాద్ రైతులకు పలు సూచనలు చేశారు.

జూన్‌లో నాటిన పత్తి పంట వర్షాలు తక్కువగా ఉన్నా జులైలో 75-100 mm వర్షం పడితే కోలుకుంటుందని ఆయన చెప్పారు. జులైలో వర్షాలు తక్కువైతే పత్తికి బదులు ప్రత్యామ్నాయ పంటలు వేయాలని సూచించారు. ఆగస్టు 15 వరకు పత్తి వేసేందుకు అవకాశం ఉందని, ఆ తర్వాత కంది, పెసర, మినువు, జొన్న వంటి మెట్టపంటలు వేసుకోవచ్చని తెలిపారు.

డెల్టా ప్రాంతాల్లో కాలువల ద్వారా నీరు ఆలస్యంగా విడుదలైతే, 120 రోజుల్లో చేతికొచ్చే స్వల్పకాలిక వరి రకాలు ఎంచుకోవాలని, ఎరువుల వాడకం తగ్గించాలని దుర్గాప్రసాద్ సలహా ఇచ్చారు. కలుపు సమస్య ఎక్కువగా ఉంటుందని, కలుపు మందులు వాడాలని చెప్పారు.

నీటి ఎద్దడిని డ్రిప్, స్ప్రింక్లర్ ఇరిగేషన్ ద్వారా తగ్గించుకోవచ్చని, అయితే వాటి ఖర్చు ఎక్కువని ఆయన వివరించారు. కూరగాయల పంటలకు నీటి ప్రాంతాలు పరిమితంగా ఉండటంతో పెద్ద ఇబ్బంది ఉండదని తెలిపారు.

రైతులు శాస్త్రవేత్తల సూచనలు పాటిస్తూ, తక్కువ వర్షపాతాన్ని తట్టుకునేలా సన్నద్ధం కావాలని దుర్గాప్రసాద్ కోరారు.