ఎల్నినోతో కాకినాడ జిల్లాలో వర్షాభావం..ఆరుతడి పంటలపై వ్యవసాయశాఖ సూచనలు

కాకినాడ జిల్లాలో ఎల్నినో ప్రభావంతో వర్షాభావం కొనసాగుతోంది. జూలై మూడవ వారంలోకి అడుగుపెట్టినా ఆశించిన స్థాయిలో వర్షాలు రాలేదు. దీంతో వరిసాగు వెనకబడింది. వ్యవసాయ శాఖ అధికారులు మెట్ట ప్రాంత రైతులు ఆరుతడి పంటల వైపు మళ్లాలని సూచిస్తున్నారు.

జిల్లా వ్యవసాయ శాఖ అధికారి రాబర్ట్ మాట్లాడుతూ, కాకినాడ జిల్లాలో సాధారణంగా వరిసాగు 2.2 లక్షల ఎకరాల నుంచి 2.3 లక్షల ఎకరాల మధ్య ఉంటుందన్నారు. ప్రస్తుతం 55 వేల ఎకరాల్లో మాత్రమే వరి నాట్లు పడ్డాయి. మరో 1,800 ఎకరాల్లో ప్రత్యామ్నాయ పంటలు సాగు చేపట్టారు. వర్షాలు రాకపోతే రైతులు నష్టపోకుండా ఉండేందుకు ఆల్టర్నేటివ్ కంటిన్జెన్సీ ప్లాన్‌ను ప్రభుత్వానికి నివేదించామని, ఇందుకోసం 1,300 క్వింటాళ్ల విత్తనాలు (మినుములు, పెసలు, ఉలవలు) సిద్ధంగా ఉంచామని తెలిపారు. మెట్ట ప్రాంతాల్లో వర్షాలు కురవని పక్షంలో ఈ విత్తనాలు పంపిణీ చేస్తామన్నారు.

పంట నష్టాన్ని తగ్గించుకోవడానికి పంట బీమా పథకాలు అందుబాటులో ఉన్నాయి. వరికి ఆగస్టు 15 లోపు ఎకరానికి ₹760 ప్రీమియం చెల్లించి బీమా చేయించుకోవచ్చు. రైతులు పంట వేసే ముందే ప్రీమియం కట్టే అవకాశం ఈ సీజన్ నుంచి కల్పించారు. వాతావరణ ఆధారిత బీమా పథకం కింద ప్రతి పంటకు ఎకరానికి ₹2,000 ప్రీమియంతో బీమా సౌకర్యం ఉంది; దీనికి జూలై 24 లోపు చెల్లించాలి. రుణం తీసుకోని రైతులు కూడా కామన్ సర్వీస్ సెంటర్ ద్వారా ప్రీమియం కట్టవచ్చు.

ఎల్నినో ప్రభావం తీవ్రంగా ఉండే అవకాశం ఉన్నందున, నీటి వసతి లేని టెయిలెండ్ ప్రాంతాల రైతులు మినుములు, పెసలు వంటి ఆరుతడి పప్పు పంటలు వేసుకోవాలని అధికారి సూచించారు. ఇప్పటికే జిల్లాలో 50,000 నవధాన్యాల కిట్లను పంపిణీ చేశారు. శాస్త్రవేత్తల హెచ్చరికల మేరకు రైతులకు అవగాహన శిబిరాలు, శిక్షణలు ఇస్తున్నామన్నారు.