ఎల్ నినో ప్రభావంతో తెలంగాణలో కూరగాయల దిగుబడి కుదించి, ధరలు భారీగా పెరిగాయి

ఎల్ నినో ప్రభావంతో తెలంగాణలో జూన్ లో కురవాల్సిన వర్షాలు పడకపోవడంతో కూరగాయల సాగు తీవ్రంగా దెబ్బతింది. నీటి కొరత, పెరిగిన సాగు ఖర్చులు, తగ్గిన దిగుబడి కారణంగా రైతులు నష్టపోతున్నారు. కూరగాయల ధరలు కూడా విపరీతంగా పెరిగాయి.

రాష్ట్రంలో టమాటా, చిక్కుడు, బీన్స్, క్యాబేజీ వంటి కూరగాయల ఉత్పత్తి సగానికి పైగా పడిపోయింది. చిక్కుడు పంటలు ఎండిపోతుండగా, టమాటా దిగుబడి దాదాపు లేకుండా పోయింది. గతంలో హోల్ సేల్ మార్కెట్ లో కిలో రూ.50-60 ఉన్న టమాటా, ఇప్పుడు ఇతర రాష్ట్రాల నుంచి దిగుమతి చేసుకోవాల్సిన పరిస్థితి ఏర్పడింది.

బీన్స్ ధరలు రైతు బజార్ లోనే రూ.100 కాగా, రిటైల్ మార్కెట్ లో రూ.150-180 వరకు అమ్ముడవుతోంది. చిక్కుడుకాయ కూడా రైతు బజార్ లో రూ.70-80 ఉండగా, బయట మార్కెట్ లో రూ.150 వరకు పలుకుతోంది. స్థానికంగా సరుకు లేకపోవడంతో, మహారాష్ట్ర, తమిళనాడు, మధ్యప్రదేశ్ లాంటి రాష్ట్రాల నుంచి కూరగాయలు దిగుమతి అవుతున్నాయి.

రైతులు బోరు నీళ్లతో వాటర్ స్ప్రే చేస్తూ, పంటలను నిలబెట్టుకునే ప్రయత్నం చేస్తున్నారు. ఎండలు ఎక్కువవడం, వర్షాలు పూర్తిగా లేకపోవడంతో మొక్కలు ఎండిపోతున్నాయి. చిక్కుడు విత్తనాల ధర కిలో రూ.30,000 వరకు పలుకుతుండటంతో, రైతులు తీవ్ర నష్టాలను ఎదుర్కొంటున్నారు.

తెలంగాణలో కూరగాయల సాగు విస్తీర్ణం గతంలో 5,52,000 ఎకరాలుండగా, 2025 నాటికి కేవలం 50,000 ఎకరాలకు పడిపోయినట్లు రైతు కమిషన్ సభ్యులు తెలిపారు. హైదరాబాద్ శివార్లలోని గ్రామాలు ఒకప్పుడు హార్టికల్చర్ కు కేంద్రంగా ఉండేవి, కానీ రియల్ ఎస్టేట్ విస్తరణతో సాగు తగ్గిపోయింది. ప్రస్తుతం ఆకూరలు, బంగాళాదుంప, బీరకాయ వంటివి దిగుమతి చేసుకునే పరిస్థితి ఉందని వారు వెల్లడించారు.

అయితే, ప్రభుత్వం కూరగాయల సాగును పెంచేందుకు చర్యలు ప్రారంభించింది. యాచారం మండలంలోని మూడు గ్రామాల్లో పైలట్ ప్రాజెక్ట్ కింద 365 ఎకరాల్లో సాగు చేపట్టగా, కేవలం ఎనిమిది నెలల్లోనే ఆ ప్రాంతంలో సాగు విస్తీర్ణం 800-900 ఎకరాలకు పెరిగింది. ఫార్మ్ ఇంప్లిమెంట్స్, మల్చింగ్ షీట్లు, స్పెషల్ ఆఫీసర్ నియామకం, మార్కెట్ సౌకర్యాలు వంటివి కల్పించడంతో ఈ పురోగతి సాధ్యమైందని రైతు కమిషన్ సభ్యులు తెలిపారు.

రానున్న రెండు, మూడు నెలల్లో పరిస్థితి మరింత తీవ్రమయ్యే అవకాశం ఉంది. ఇతర రాష్ట్రాల నుంచి దిగుమతులు కూడా తగ్గితే, కూరగాయల ధరలు మరింత పెరిగి, సామాన్య ప్రజలపై ఆర్థిక భారం పడే అవకాశం ఉందని నిపుణులు హెచ్చరిస్తున్నారు.