ఏలూరు జిల్లాలో రైతుల పొలాల నుంచి కరెంట్ వైర్లు దొంగతనం; నిందితులు అరెస్టు

ఏలూరు జిల్లా నూజువీడు, ముసునూరు మండలాల్లో రైతుల పొలాల్లో కాపర్ వైర్ల దొంగతనాలు జరుగుతున్నాయి. పొలాలకు కరెంట్ సరఫరా కోసం ఏర్పాటు చేసిన వైర్లు రాత్రిపూట మాయమవుతున్నట్లు రైతులు ఫిర్యాదు చేశారు.

పలువురు రైతుల నుంచి వరుసగా ఫిర్యాదులు రావడంతో ఏలూరు జిల్లా ఎస్పి ప్రతాప్ శివ కిషోర్ రాత్రి గస్తీని ముమ్మరం చేయాలని ఆదేశించారు. పోలీసులు రాత్రి పూట పెట్రోలింగ్ నిర్వహిస్తుండగా బైకులపై వెళ్తున్న అనుమానితులు కనిపించారు. వారి వద్ద కరెంట్ వైర్ల మూటలు దొరకడంతో పోలీసులు అదుపులోకి తీసుకున్నారు. నిందితులు తప్పించుకునే ప్రయత్నం చేసినా పోలీసులు పట్టుకున్నారు.

నిందితులను కోర్టులో హాజరుపరిచారు. పోలీసుల ప్రకారం వీరు గంజాయికి బానిసలు, డ్రగ్స్ కోసం వైర్లు దొంగిలిస్తున్నారని తెలిపారు.