విశాఖలో ఉద్యోగుల కృతజ్ఞత సభ: CPS రద్దు చేసి OPS అమలుపై సంబరాలు

విశాఖపట్నంలోని స్వర్ణభారతీ ఇండోర్ స్టేడియంలో ఉపాధ్యాయ ఉద్యోగుల కృతజ్ఞత అభినందన సభ ఘనంగా జరిగింది. దశాబ్దాలుగా ఎదురుచూసిన ప్రధాన డిమాండ్ అయిన CPS రద్దు చేసి OPS అమల్లోకి తీసుకురావడంతో ఉద్యోగులు సంబరాలు చేసుకున్నారు.

ముఖ్యమంత్రి నారా చంద్రబాబు నాయుడు GO నంబర్ 53 విడుదల చేయడంతో రాష్ట్రవ్యాప్తంగా సుమారు పదకొండు వేల మంది ఉద్యోగ ఉపాధ్యాయులకు పాత పెన్షన్ విధానం వర్తింపు జరిగింది. 2004 సెప్టెంబర్ 1 నుంచి అమల్లోకి వచ్చిన CPS విధానం స్థానంలో మళ్ళీ OPS అమలు చేయడం చారిత్రాత్మక నిర్ణయంగా ఉద్యోగులు కొనియాడారు.

OPS విధానం వల్ల ఉద్యోగి పదవీ విరమణ తర్వాత జీవితాంతం పెన్షన్ వస్తుంది, మరణానంతరం నామినీకి కూడా పెన్షన్ కొనసాగుతుందని ఉపాధ్యాయ సంఘాల నేతలు వివరించారు. ఇది ఒక సామాజిక ఆర్థిక భరోసా అని వారు అభివర్ణించారు.

2003 DSC నోటిఫికేషన్ ఇచ్చింది చంద్రబాబు నాయుడే, నేడు OPS కూడా ఇచ్చింది చంద్రబాబు నాయుడే అని ఉపాధ్యాయులు పేర్కొన్నారు. గత ప్రభుత్వం 2019లో హామీ ఇచ్చినప్పటికీ ఐదు సంవత్సరాలు నెరవేర్చలేదని, ఇప్పుడు కూటం ప్రభుత్వం తమ చిరకాల వాంఛను నెరవేర్చిందని ఉద్యోగులు తెలిపారు.

సుమారు 34 వేల కోట్ల ఆర్థిక భారం అయినప్పటికీ ముఖ్యమంత్రి ఈ నిర్ణయం తీసుకున్నారని, దీనికి జీవితాంతం రుణపడి ఉంటామని ఉద్యోగ సంఘాల నేతలు హర్షాతిరేకాలు వ్యక్తం చేశారు. కేంద్ర ప్రభుత్వం జారీ చేసిన మెమో నంబర్ 57కి అనుగుణంగా GO నంబర్ 53 విడుదల చేసినందుకు ముఖ్యమంత్రికి ధన్యవాదాలు తెలిపారు.

విద్యాశాఖ మంత్రి లోకేష్ చేస్తున్న కృషి వల్ల ప్రభుత్వ పాఠశాలలకు మరియు ఉపాధ్యాయులకు సమాజంలో గౌరవం పెరిగిందని, DSC నిర్వహించి ఉద్యోగ నియామకాలు చేసినందుకు కూడా ప్రభుత్వాన్ని ఉద్యోగులు అభినందించారు. ఉత్తరాంధ్ర నలుమూలల నుండి ఉద్యోగులు కుటుంబ సభ్యులతో సహా ఈ కృతజ్ఞత సభలో పాల్గొన్నారు.