ఏనుగు రవీందర్ రెడ్డి తిరిగి BRSలో చేరతారా? ఎల్లారెడ్డి రాజకీయాల్లో చర్చ

కామారెడ్డి జిల్లా ఎల్లారెడ్డి నియోజకవర్గంలో కాంగ్రెస్ నేత ఏనుగు రవీందర్ రెడ్డి తిరిగి BRSలో చేరతారనే ప్రచారం జోరుగా సాగుతోంది. ఈ చర్చతో స్థానిక రాజకీయాలు మళ్లీ వేడెక్కాయి.

ఏనుగు రవీందర్ రెడ్డి గతంలో BRS తరపున ఎల్లారెడ్డి నుంచి ఎమ్మెల్యేగా గెలిచారు. 2021లో బీజేపీలో, 2023లో కాంగ్రెస్లో చేరి బాన్సవాడ నుంచి పోటీ చేసి ఓడిపోయారు. ఇటీవల రుద్రూరు వేదికగా ఆయన రాజకీయంగా చురుకుగా మారడంతో తిరిగి సొంత పార్టీలో చేరతారనే ఊహాగానాలు ఊపందుకున్నాయి.

ఈ ప్రచారం నేపథ్యంలో మాజీ ఎమ్మెల్యే జాజుల సురేందర్ BRS కార్యక్రమాల్లో దూకుడు పెంచారు. 2023 ఎన్నికల్లో ఓటమి తర్వాత నిశ్శబ్దంగా ఉన్న ఆయన ఇటీవల రైతు సమస్యలపై నిరసనలు, అరెస్టులతో పార్టీ దృష్టిని ఆకర్షించే ప్రయత్నం చేస్తున్నారు. పార్టీ వర్గాల విశ్లేషణ ప్రకారం, ఏనుగు రవీందర్ రెడ్డి తిరిగి వస్తే ఎల్లారెడ్డి సీటుపై పోటీ పడే అవకాశం ఉండటంతో ఆయన ముందస్తుగా తన స్థానాన్ని బలోపేతం చేసుకుంటున్నారు.

మరోవైపు బాన్సవాడలో BC నాయకత్వాన్ని ప్రోత్సహించే దిశగా BRS ప్రయత్నాలు జరుగుతున్నట్లు ప్రచారం ఉంది. ఒకవేళ ఏనుగు రవీందర్ రెడ్డి బీఆర్ఎస్లో చేరితే ఎల్లారెడ్డిపై దృష్టి పెట్టొచ్చని అంచనాలు వినిపిస్తున్నాయి. అయితే ఇవన్నీ ప్రస్తుతానికి ఊహాగానాలు మాత్రమేనని, ఎలాంటి అధికారిక ప్రకటన రాలేదని పార్టీ వర్గాలు పేర్కొంటున్నాయి. రానున్న రోజుల్లో ఈ విషయంపై స్పష్టత రావొచ్చు.