రాష్ట్రవ్యాప్తంగా ఈఎస్ఐ డిస్పెన్సరీల్లో మందుల కొరత; కార్మికులు ఇబ్బందులు

ఆంధ్రప్రదేశ్‌లోని ఈఎస్ఐ డిస్పెన్సరీలు, ఆసుపత్రుల్లో మందుల కొరత ఏర్పడింది. దీంతో కార్మికులు ఇబ్బందులు ఎదుర్కొంటున్నారు.

2026-27 సంవత్సరానికి సంబంధించి ఇప్పటివరకు మందుల ఇండెంట్ పెట్టలేదు. రాష్ట్రంలో 14.56 లక్షల మంది ఈఎస్ఐ కార్మికులు ఉండగా, 78 డిస్పెన్సరీలు, నాలుగు ఆసుపత్రులు, మూడు డయాగ్నోస్టిక్ సెంటర్లు ఉన్నాయి. అందుబాటులో లేని మందుల కోసం ఇండెంట్ పెట్టామని విజయవాడ ESI ప్రధాన ఆసుపత్రి సూపరింటెండెంట్ తెలిపారు.

బీపీ, మధుమేహం, థైరాయిడ్, కీళ్ల నొప్పులు వంటి సమస్యలకు సంబంధించిన మందులు సరిపడా లేవు. కొన్ని మందులు 4-5 రోజులకు మాత్రమే ఇస్తున్నారు. మందులు లేకపోతే బయట కొనుక్కొని బిల్లులు పెట్టుకోవాలని సూచిస్తున్నారు. కానీ రీయింబర్స్మెంట్ ఆలస్యం అవుతోందని కార్మికులు చెబుతున్నారు. కొన్ని డిస్పెన్సరీల్లో బ్లడ్ టెస్ట్ సదుపాయం కూడా లేదు.

ఈఎస్ఐ అనుమతించిన రేట్ కాంట్రాక్ట్ లోని మందులు తెప్పిస్తున్నామని, అదనంగా లార్విన్ అనే ఆథరైజ్డ్ డీలర్ ద్వారా ఇతర మందులు తెప్పించే ప్రక్రియ జరుగుతోందని సూపరింటెండెంట్ వివరించారు. కార్మికులు బయట కొన్న మందులకు వెంటనే రీయింబర్స్మెంట్ చేస్తామన్నారు. ఏవైనా ఇబ్బందులు ఉంటే సరిచేస్తామని చెప్పారు.