నిత్యవసర ధరల పెరుగుదల: మధ్యతరగతి కుటుంబాల బడ్జెట్‌పై భారం

కూరగాయలు, నిత్యవసర వస్తువుల ధరలు పెరగడంతో మధ్యతరగతి కుటుంబాల నెలవారీ బడ్జెట్ దెబ్బతింటోంది. ఆదాయంలో పెద్దగా పెరుగుదల లేకపోవడంతో అనేక కుటుంబాలు నెల గడపడం కష్టంగా మారిందని చెబుతున్నాయి. ఇంటి అద్దె, కిరాణా, కూరగాయలు, కరెంట్ బిల్లు ప్రతి ఖర్చు బడ్జెట్‌పై ఒత్తిడి తెస్తోంది.

టమాటా, ఉల్లిగడ్డ, పచ్చిమిర్చి, అల్లం, వెల్లుల్లి ధరలు వంటింటి బడ్జెట్‌ను భారంగా మార్చాయి. గతంలో కిలోల లెక్కన కొనుగోలు చేసిన వారు ఇప్పుడు పావు కిలో, అర కిలోలతో సరిపెట్టుకుంటున్నారు. బియ్యం, పప్పులు, వంట నూనె ధరలు కూడా పెరిగాయి. టీ పొడి, సబ్బులు, టూత్‌పేస్ట్, హెయిర్ ఆయిల్, ప్యాకేజ్‌డ్ ఫుడ్ ధరలు కూడా పెరగడంతో ఖర్చు మరింత జోడవుతోంది.

కూరగాయలు అమ్ముకునే ఓ విక్రేత మాట్లాడుతూ, తనకు రోజుకు ₹700 నుంచి ₹1,000 వరకు వస్తుందని చెప్పారు. మార్కెట్‌కు ఉదయం 5 గంటలకే వెళ్లి రాత్రి 10:30 గంటల వరకు పని చేస్తానని తెలిపారు. ఐదుగురు సభ్యులున్న తన కుటుంబం ఒక్కరి ఆదాయంపైనే ఆధారపడి ఉందన్నారు. నూనె ప్యాకెట్ ధర ₹150 నుంచి ₹180కి పెరిగిందని, ఉల్లిపాయ కిలో ₹50 నుంచి ₹80 వరకు ఉందని ఆయన చెప్పారు.

పిల్లల చదువుల ఖర్చు కూడా తల్లిదండ్రులకు భారంగా మారుతోంది. స్కూల్ ఫీజులు, పుస్తకాలు, యూనిఫారాలు, ట్రాన్స్‌పోర్ట్ ఖర్చులు పెరుగుతున్నాయని వారు చెబుతున్నారు. పిల్లల భవిష్యత్తు కోసం చదివించాల్సిందే కానీ పెరుగుతున్న ఫీజులు భరించడం కష్టమవుతోందని తల్లిదండ్రులు అంటున్నారు.

మరో వ్యాపారి మాట్లాడుతూ, ఇల్లు నడపడానికి నెలకు ₹15,000 నుంచి ₹20,000 అవుతోందని తెలిపారు. అద్దెలు, రవాణా ఖర్చులు, పెట్రోల్ కలిపి నెలకు ₹30,000 నుంచి ₹40,000 అవసరమవుతున్నాయని ఆయన చెప్పారు. ఖర్చులకు, వస్తువుల ధరలకు మధ్య సరిపోలిక లేకపోవడంతో మార్జిన్ మిగలడం లేదని అన్నారు. పొదుపు పూర్తిగా తగ్గిపోయిందని, అత్యవసర ఖర్చులు వస్తే మరింత ఇబ్బంది ఎదురవుతుందని ఆయన చెప్పారు. పండుగలు, పెళ్లిళ్ల సమయంలో బట్టలు, బహుమతులు, ప్రయాణాల ఖర్చులతో బడ్జెట్ మరింత పెరుగుతోందని, దీంతో కొత్త కొనుగోళ్లను వాయిదా వేస్తున్నామని కుటుంబాలు తెలిపాయి.