పాలమూరు కళాకారుల వెదురు బొమ్మలకు NIFT విద్యార్థుల ఆసక్తి

పాలమూరు జిల్లాకు చెందిన కళాకారులు వెదురుతో బొమ్మలు, ఇంటి అలంకరణ వస్తువులు తయారు చేస్తున్నారు. నెమలి, ఎద్దుల బండి, బుల్లెట్ బైక్, స్కూటర్, ఉయ్యాల, గాలి మోటరు, గుర్రం బండి లాంటి డిజైన్లు వీటిలో ఉన్నాయి. గోడకు తగిలించే బొమ్మలు, మూతలు ఉన్న బుట్టలు కూడా వీరు తయారు చేస్తున్నారు.

ప్లాస్టిక్ వాడకం తగ్గించాలని ఈ వస్తువులు చేస్తున్నట్టు కళాకారులు చెప్తున్నారు. ఈ సంప్రదాయ కళ అంతరించకుండా ఉండాలని కూడా వారు చెబుతున్నారు. దాదాపు 31 సంవత్సరాలుగా వీరు ఈ పని చేస్తున్నారు. కొత్త కొత్త ఫ్యాషన్ డిజైన్లతో తయారు చేసిన వస్తువులకు గిరాకీ పెరుగుతోందని వారు తెలిపారు.

హైదరాబాద్‌లోని నేషనల్ ఇన్‌స్టిట్యూట్ ఆఫ్ ఫ్యాషన్ టెక్నాలజీ (NIFT) విద్యార్థులు శిక్షణ కోసం వీరి వద్దకు వస్తున్నారు. ఏటా 10 రోజులు ఇక్కడ ఉండి వెదురు ఉత్పత్తుల తయారీ నేర్చుకుంటున్నారు. ఈసారి 13 మంది విద్యార్థులు వచ్చి ట్రైనింగ్ తీసుకున్నారు. ఇతర రాష్ట్రాల విద్యార్థులు కూడా ఇక్కడికి వస్తున్నారు.

గత సంవత్సరం ఈ కళాకారులకు స్టేట్ అవార్డు లభించింది. నేషనల్ అవార్డు కోసం వారు దరఖాస్తు చేశారు.