జవహర్‌నగర్ డంప్‌యార్డు వ్యవహారంపై ఈటల రాజేందర్ నేతృత్వంలో ఎంపీలు కేంద్ర మంత్రి ఖట్టర్‌ను కలిసి చర్చ

జవహర్‌నగర్ డంప్‌యార్డులో చెత్త డంపింగ్ నిలిపివేయాలని తెలంగాణ ఎంపీలు కేంద్ర మంత్రి మనోహర్ లాల్ ఖట్టర్‌ను కలిశారు. ఎంపీ ఈటల రాజేందర్ ఈ బృందానికి నేతృత్వం వహించగా, మొత్తం ఆరుగురు ఎంపీలు పాల్గొన్నారు.

ఈ సందర్భంగా ఈటల రాజేందర్ మాట్లాడుతూ, హైదరాబాద్ జనాభా 30 లక్షలు ఉన్నప్పుడు జవహర్‌నగర్ డంప్‌యార్డును ఏర్పాటు చేశారని తెలిపారు. ప్రస్తుతం దాదాపు 2 కోట్ల మంది జనాభా నుంచి రోజుకు 10 వేల మెట్రిక్ టన్నుల చెత్త అక్కడ వేస్తున్నారన్నారు. చెత్త గుట్టలుగా పేరుకుపోవడంతో 40 కిలోమీటర్ల పరిధిలోని ప్రజలు తీవ్ర ఇబ్బందులు పడుతున్నారని చెప్పారు.

డంప్‌యార్డు కారణంగా చుట్టుపక్కల కాలువలు, చెరువుల నీరు కలుషితమైందన్నారు. బోరు బావుల నీరు కూడా పనికిరాకుండా పోయిందని చెప్పారు. దీంతో లక్షలాది మంది అనారోగ్యం పాలవుతున్నారని, సంపాదించిన డబ్బు ఆస్పత్రులకు ఖర్చు చేయాల్సి వస్తోందని వివరించారు.

కేంద్ర మంత్రి ఖట్టర్ సానుకూలంగా స్పందించినట్లు ఈటల రాజేందర్ తెలిపారు. జవహర్‌నగర్‌లో ఇకపై ఒక కిలో చెత్త కూడా వేయొద్దని కోరామన్నారు. ఆధునిక సాంకేతికతతో కాలుష్యం లేకుండా చెత్త నిర్వహణ చేయాలని డిమాండ్ చేశామని తెలిపారు. మంత్రి దీనికి అంగీకరించి, వేల కోట్ల రూపాయలతో ప్రాజెక్ట్ చేపట్టి శాశ్వత పరిష్కారం చూపిస్తామని హామీ ఇచ్చారని పేర్కొన్నారు. జీరో పొల్యూషన్ టెక్నాలజీతో బయో గ్యాస్, విద్యుత్ ఉత్పత్తి వంటి ప్లాంట్లు ఏర్పాటు చేస్తామని తెలిపారు.