అధిక వేడి వల్ల గర్భస్థ శిశువుల బరువు తగ్గిపోయే ప్రమాదం: అధ్యయనం

IIT ఢిల్లీ, యూనివర్సిటీ ఆఫ్ లివర్పూల్ పరిశోధకులు సంయుక్తంగా చేసిన అధ్యయనంలో, అధిక ఉష్ణోగ్రతలు గర్భిణీ స్త్రీలు, గర్భస్థ శిశువులపై తీవ్ర ప్రభావం చూపుతాయని తేలింది. 2015 నుంచి 2020 మధ్య కాలంలో ఐదేళ్ల పాటు వివిధ ప్రాంతాల్లో లక్షల మంది గర్భిణుల ఆరోగ్య డేటాను విశ్లేషించారు.

వరుసగా 3-4 రోజులు అధిక ఉష్ణోగ్రతలు నమోదైన ప్రాంతాల్లో నివసించిన గర్భిణులలో, గర్భస్థ శిశువులు తక్కువ బరువుతో జన్మించే ప్రమాదం ఎక్కువగా ఉందని పరిశోధకులు గుర్తించారు. ప్రతి 1 డిగ్రీ సెంటీగ్రేడ్ ఉష్ణోగ్రత పెరిగితే, శిశువు తక్కువ బరువుతో పుట్టే అవకాశం ఒక శాతం పెరుగుతుంది.

తక్కువ విద్యార్హత కలిగిన, పౌష్టికాహారం లేని మహిళలపై ఈ ప్రభావం మరింత తీవ్రంగా ఉంటుందని అధ్యయనంలో వెల్లడైంది. ముఖ్యంగా గ్రామీణ ప్రాంతాల్లో ఉన్న నిరుపేద మహిళలు అధిక వేడికి ఎక్కువగా ప్రభావితమవుతున్నారు.

హీట్ యాక్షన్ ప్లాన్స్ అమలు చేసే నగరాలు, పట్టణాలు గర్భిణుల సంరక్షణపై ప్రత్యేక దృష్టి పెట్టాలని పరిశోధకులు సూచించారు. వేసవి కాలంలో ఎండ తీవ్రత నుంచి గర్భిణులను రక్షించే చర్యలు తీసుకోవాలి.