మంచిర్యాల జిల్లా లక్షెట్టిపేటలో రైతుల నిరసన; పంట వ్యాపారి ఇంటిపై దాడి

మంచిర్యాల జిల్లా లక్షెట్టిపేటలో పంట వ్యాపారిపై రైతుల నిరసన హింసాత్మకంగా మారింది. పంట ధాన్యం కొనుగోలు చేసి చెల్లింపులు చేయలేదని ఆరోపిస్తూ, రైతులు వ్యాపారి ఇంటిపై దాడి చేసి ఫర్నిచర్ను తగులబెట్టారు.

అక్కనపల్లి శ్రీధర్ అనే వ్యాపారి 2024-2025 రబీ, ఖరీఫ్ సీజన్లలో లక్షెట్టిపేట, చుట్టుపక్కల గ్రామాల రైతుల నుంచి ధాన్యం కొనుగోలు చేశారు. దాదాపు 250-300 మంది రైతులకు సుమారు రూ.6-9 కోట్ల విలువైన ధాన్యం తీసుకుని డబ్బులు చెల్లించకుండా హైదరాబాద్ వెళ్లిపోయారని రైతులు ఆరోపిస్తున్నారు.

గతంలో స్థానిక ఎమ్మెల్యే ప్రేమసాగర్ రావు జోక్యం చేసుకొని శ్రీధర్ నుంచి రూ.1 కోటి రికవరీ చేసి రైతులకు అందించారు. మిగతా బకాయిల కోసం రైతులు గత రెండేళ్లుగా ఎదురుచూస్తున్నారు. ఈరోజు అకస్మాత్తుగా రైతులు ఆగ్రహం వ్యక్తం చేశారు.

పెద్ద సంఖ్యలో రైతులు శ్రీధర్ ఇంటికి వెళ్లి, ఇంట్లోని ఫర్నిచర్, ఇతర వస్తువులను బయటకు తీసి రోడ్డుపై పడవేసి నిప్పంటించారు. సమాచారం అందుకున్న పోలీసులు వెంటనే ఘటనా స్థలానికి చేరుకుని పరిస్థితిని అదుపు చేసే ప్రయత్నం చేశారు. ప్రస్తుతం లక్షెట్టిపేటలో భారీ పోలీసు బందోబస్తు ఏర్పాటు చేశారు.

బాధిత రైతులు మాట్లాడుతూ, తాము పంటల కోసం అప్పులు చేశామని, డబ్బులు రాకపోతే తీవ్ర ఇబ్బందులు ఎదురవుతాయని తెలిపారు. నిందితుడిపై కఠిన చర్యలు తీసుకోవాలని డిమాండ్ చేశారు.