ఎఫ్సీఆర్ఏ బిల్లుపై పార్లమెంట్లో ఆగస్టు 12 నుంచి చర్చ; మైనారిటీ వర్గాలు, ఈశాన్య రాష్ట్రాల నుంచి వ్యతిరేకత

కేంద్రంలో బీజేపీ నేతృత్వంలోని ఎన్డీఏ ప్రభుత్వం ప్రవేశపెట్టనున్న విదేశీ విరాళాల నియంత్రణ చట్టం (FCRA) సవరణ బిల్లుపై పార్లమెంట్లో వచ్చే వారం చర్చ ప్రారంభం కానుంది. మిజోరం ముఖ్యమంత్రి లాల్దుహోమా గురువారం హోంమంత్రి అమిత్ షాతో సమావేశమైన అనంతరం ఈ విషయం వెల్లడించారు. ఈశాన్య రాష్ట్రాల్లో జనాభా మార్పులు, క్రైస్తవ జనాభా పెరుగుదల నేపథ్యంలో ఈ బిల్లు ఆ రాష్ట్రాలపై ప్రభావం చూపుతుందని ఆయన ఆందోళన వ్యక్తం చేశారు. అమిత్ షా తమ సిఫార్సులను పరిగణలోకి తీసుకుంటామని హామీ ఇచ్చారని లాల్దుహోమా మీడియాకు తెలిపారు.

అదేరోజు మైనారిటీ వర్గాలు, చర్చి సంస్థల ప్రతినిధులు, డీఎంకే ఎంపీ విల్సన్ కూడా హోంమంత్రిని కలిసి మూడు అంశాలతో కూడిన సిఫార్సు పత్రం సమర్పించారు. బిల్లును ఉపసంహరించుకుని జాయింట్ పార్లమెంటరీ కమిటీ (JPC)కి పంపాలని, వివాదాస్పద నిబంధనలను పునఃపరిశీలించాలని వారు డిమాండ్ చేశారు. ముఖ్యంగా, ఎఫ్‌సీఆర్‌ఏ లైసెన్స్ రద్దయిన ఎన్జీవోల ఆస్తులను ప్రభుత్వం స్వాధీనం చేసుకునే నిబంధనపై తీవ్ర వ్యతిరేకత ఉంది. ఈ నిబంధన వల్ల ఎన్జీవోలు నిర్వహిస్తున్న ఆస్పత్రులు, విద్యా సంస్థలు ప్రభుత్వం చేతికి వెళ్లిపోతాయని వారు భయపడుతున్నారు.

డీఎంకే పార్టీ బిల్లును తీవ్రంగా వ్యతిరేకిస్తున్న విషయం కేంద్రానికి కీలకంగా మారింది. డీలిమిటేషన్ బిల్లు ఆమోదానికి డీఎంకే మద్దతు అవసరం కాబట్టి, ఎఫ్‌సీఆర్‌ఏ బిల్లులో రాజీకి ప్రభుత్వం సిద్ధమేనని విశ్లేషకులు భావిస్తున్నారు. ఈశాన్య రాష్ట్రాలతో పాటు దక్షిణాది రాష్ట్రాల్లోనూ విదేశీ నిధులు పొందే ఎన్జీవోలు ఎక్కువగా ఉన్నాయి. మతమార్పిడులు, ఇతర అక్రమాలకు విదేశీ నిధులు ఉపయోగపడుతున్నాయని ఇంతకుముందు రిపబ్లిక్ టీవీ నిర్వహించిన స్టింగ్ ఆపరేషన్ లో వెల్లడైన విషయాన్ని ఇక్కడ గుర్తుచేసుకోవాలి.

వచ్చే సోమ, మంగళవారాల్లో బిల్లును పార్లమెంటులో ప్రవేశపెట్టే అవకాశం ఉండగా, ఆగస్టు 12 నుంచి చర్చ ప్రారంభమవుతుందని లాల్దుహోమా తెలిపారు. పార్లమెంటు ఉభయ సభల్లో ఈ బిల్లుపై రాజకీయ వాగ్వాదం తీవ్రంగా సాగనుంది.