సన్నబియ్యం ధరలు క్వింటాల్ ₹10,000 దాటాయి; వరంగల్ మార్కెట్‌లో నెలలో ₹2,000 పెరుగుదల

వరంగల్ మార్కెట్‌లో సన్నబియ్యం ధరలు క్వింటాల్ ₹10,000 దాటాయి. గత ఒక నెలలోనే క్వింటాల్‌కు ₹2,000 నుంచి ₹2,500 వరకు ధరలు పెరిగాయి.

జై శ్రీరామ్ రకం బియ్యం క్వింటాల్ ధర ₹9,200 నుంచి ₹9,600 వరకు ఉంది. ఫైన్ క్వాలిటీ జై శ్రీరామ్ క్వింటాల్ ₹10,000 పైనే పలుకుతోంది. HMT, RNR రకాలు క్వింటాల్ ₹8,500 నుంచి ₹9,000 వరకు ఉన్నాయి. విజయ మసూరి ₹6,000 నుంచి ₹7,000, BPT రకం ₹6,000 నుంచి ₹7,500 వరకు ధర ఉంది.

హోల్‌సేల్‌లో విజయ మసూరి కిలో ధర గతంలో ₹50 ఉండగా, ఇప్పుడు ₹60 నుంచి ₹70కి పెరిగింది. జై శ్రీరామ్ కిలో ధర ₹75 నుంచి ₹95-₹100 వరకు పెరిగింది.

వ్యాపారుల ప్రకారం ఈ ఏడాది పంట తక్కువగా ఉంది. దీంతోపాటు మహారాష్ట్ర, కర్ణాటక రాష్ట్రాల నుంచి జై శ్రీరామ్ రకానికి ఎక్కువ డిమాండ్ ఉంది. అనేక మిల్లుల్లో స్టాక్ లేదని వ్యాపారులు చెప్తున్నారు.

ధరలు ఇంకా పెరిగే అవకాశం ఉందని వ్యాపారులు అంటున్నారు. రెండేళ్ల పాత బియ్యం కావాలంటే ధర ఖచ్చితంగా ఎక్కువగానే ఉంటుందని వారు తెలిపారు.