ఒడిశా నైని గని నుంచి తొలి బొగ్గు రేక్ సింగరేణి విద్యుత్ ప్లాంటుకు చేరుకుంది

ఒడిశాలోని సింగరేణి (SCCL) నైని బ్లాక్ నుంచి తొలి బొగ్గు రేక్ తెలంగాణలోని మంచిర్యాల జిల్లా జైపూర్లో ఉన్న సింగరేణి థర్మల్ పవర్ ప్లాంటుకు చేరుకుంది.

4,000 టన్నుల బొగ్గును ఈ రైలు మోసుకు వచ్చింది. 11 సంవత్సరాల క్రితం ఈ నైని బ్లాక్ సింగరేణికి కేటాయించినా, మునుపటి ప్రభుత్వం నిర్లక్ష్యం వల్ల గని పనులు పూర్తి కాలేదని సంస్థ వర్గాలు తెలిపాయి. ప్రస్తుత ప్రభుత్వం అడ్డంకులను తొలగించడంతో బొగ్గు తవ్వకం ప్రారంభమైంది.

ఈ సందర్భంగా డిప్యూటీ సీఎం భట్టి విక్రమార్క సింగరేణి సంస్థను అభినందించారు. రోజుకు 12 వేల టన్నులు, ఏడాదికి 60 లక్షల టన్నుల బొగ్గు నైని గని నుంచి తీయవచ్చని ఆయన తెలిపారు. బొగ్గు రవాణాకు రైలుతో పాటు రోడ్డు మార్గాలను కూడా పరిశీలిస్తున్నట్టు చెప్పారు.

ఇటీవలే తాడిచర్ల బ్లాక్ కూడా సింగరేణికి లభించింది. నైని గని నుంచి బొగ్గు సరఫరా షురూ కావడం వల్ల సింగరేణి విద్యుత్ ఉత్పత్తికి ముడి సరకు లభ్యత మెరుగుపడనుంది.