ధరణి, భూభారతి పోర్టళ్లలో భారీ అక్రమాలు: ఫోరెన్సిక్ ఆడిట్‌లో 304 అక్రమ ఎంట్రీలు, వేల ఎకరాల రికార్డుల ట్యాంపరింగ్

తెలంగాణలోని ధరణి, భూభారతి భూ రికార్డుల పోర్టళ్లలో పెద్ద ఎత్తున అక్రమాలు జరిగినట్టు ప్రత్యేక కమిటీ ఫోరెన్సిక్ ఆడిట్‌లో తేలింది. ఈ ఆడిట్‌లో 304 అక్రమ ఎంట్రీలు గుర్తించారు.

అధికారులు క్షేత్రస్థాయి నివేదికలు లేకుండా నేరుగా లాగిన్లు దుర్వినియోగం చేసి భూ రికార్డులను డిజిటల్‌గా ట్యాంపర్ చేసినట్టు నిర్ధారించారు. ఒక్కో అక్రమ ఎంట్రీలో డబుల్ డిజిట్ ఎకరాల చొప్పున మార్పులు చేసినట్టు కనుగొన్నారు. వీటి వల్ల వేల ఎకరాల భూమి రికార్డులు మారాయని, వాటి విలువ వేల కోట్ల రూపాయలు ఉంటుందని అంచనా.

ముఖ్యంగా ప్రభుత్వ అసైన్ పోడు భూముల రికార్డులను సిస్టం లో మార్చి, అర్హత లేని ప్రైవేట్ వ్యక్తులకు లబ్ది కలిగించినట్టు ఆడిట్‌లో వెల్లడైంది. నాల కన్వర్షన్ భూముల మ్యూటేషన్ ప్రక్రియలో తహశీల్దార్, ఆర్ఓ, కలెక్టర్ స్థాయిల్లో పరిశీలన లేకుండానే ఫైనల్ అప్రూవల్స్ ఇచ్చారు. కోర్టులో పెండింగ్‌లో ఉన్న 54 కీలక కేసుల ఫైళ్లకు అధికారుల డిజిటల్ సంతకాలు లేకుండానే సిస్టం లో ప్రాసెస్ చేసినట్టు గుర్తించారు.

మేడ్చల్ మల్కాజగిరి, సంగారెడ్డి, రంగారెడ్డి జిల్లాల పరిధిలోనే ఈ అక్రమాలు జరిగాయని నిర్ధారించారు. రిజిస్ట్రేషన్ల స్లాట్ బుకింగ్‌లో సాంకేతిక లోపాలను సాకుగా చూపి, తక్కువ ఫీజులు కట్టి అసలు చెల్లించాల్సిన రుసుము ఎగ్గొట్టినట్టు కూడా ఆడిట్‌లో తేలింది.

గత ప్రభుత్వం 2017లో ఇంటిగ్రేటెడ్ ల్యాండ్ రికార్డ్స్ మేనేజ్‌మెంట్ సిస్టం తెచ్చింది. ఆ తర్వాత 2020లో డేటాను ధరణి పోర్టల్‌లోకి మార్చారు. ధరణి నిర్వహణ ఐఎల్ఎఫ్ఎస్ సంస్థకు అప్పగించగా, దానిని టెరాసిస్ కొనుగోలు చేసి విదేశ సర్వర్లలో నడిపింది. 2024 డిసెంబర్‌లో ప్రస్తుత ప్రభుత్వం ధరణిని ఎన్ఎస్ఐసీకి అప్పగించి, భూభారతి పోర్టల్‌ను తీసుకొచ్చింది. అయితే ధరణి డేటా కోడింగ్‌పైనే భూభారతి ఆధారపడటంతో కొన్ని అక్రమాలు అక్కడా జరిగి ఉండవచ్చని అనుమానిస్తున్నారు. టెరాసిస్ ఎక్కడ అక్రమాలు చేసిందనే దానిపై సైబర్ సెక్యూరిటీ బృందంతో కలిసి ఉన్నతాధికారుల కమిటీ అధ్యయనం చేపట్టింది.