రంగారెడ్డి జిల్లాలో రూ.87 కోట్ల డబుల్ రోడ్డు నిర్మాణానికి శంకుస్థాపన

రంగారెడ్డి జిల్లాలో రూ. 87 కోట్లతో నిర్మించే డబుల్ రోడ్డు ప్రాజెక్టుకు రోడ్లు భవనాల శాఖ మంత్రి కోమటిరెడ్డి వెంకట్ రెడ్డి కేంద్ర మంత్రి కిషన్ రెడ్డితో కలిసి శంకుస్థాపన చేశారు. లేమూరు నుంచి ఎలిమినేడు వయా తిమ్మాపూర్ వరకు ఈ డబుల్ రోడ్డు నిర్మించనున్నట్టు ఆయన తెలిపారు.

గ్రామీణ ప్రాంతాల్లో వాహనాల రద్దీకి అనుగుణంగా ప్రతిపాదనలు పంపగానే వెంటనే అనుమతించిన కిషన్ రెడ్డికి ఈ సందర్భంగా మంత్రి వెంకట్ రెడ్డి ధన్యవాదాలు తెలిపారు. భూసేకరణ ప్రక్రియ పూర్తయిన తర్వాత సీఎం రేవంత్ రెడ్డి చేతుల మీదుగా రీజినల్ రింగ్ రోడ్డు (RR7) ప్రారంభోత్సవం చేస్తామని కోమటిరెడ్డి వెంకట్ రెడ్డి వివరించారు.

ప్రస్తుతం ఈ డబుల్ రోడ్డు ప్రాజెక్టుకు సంబంధించి 9 శాతం భూసేకరణ చెల్లింపు పూర్తయినట్టు మంత్రి వెల్లడించారు. అలాగే సంగారెడ్డి నుంచి చౌటుప్పల్ వరకు మరో రోడ్డు నిర్మాణానికి సంబంధించిన టెండర్లు వచ్చే నెల 6న తీసుకోనున్నట్టు చెప్పారు.