అమెరికా-ఇరాన్ శాంతి ఒప్పందంపై ఫ్రాన్స్ వీటో హెచ్చరిక

అమెరికా, ఇరాన్ దేశాల మధ్య ఒక తాత్కాలిక శాంతి ఒప్పందం కుదిరింది. ఈ ఒప్పందం ప్రకారం అమెరికా, ఇరాన్పై ఉన్న ఐక్యరాజ్య సమితి ఆర్థిక ఆంక్షలన్నింటినీ ఎత్తివేయించాలని భావిస్తోంది. కానీ, ఫ్రాన్స్ ఈ ఆంక్షల ఎత్తివేతను అడ్డుకోవచ్చని హెచ్చరించింది. ఐక్యరాజ్య సమితి భద్రతా మండలిలో శాశ్వత సభ్య దేశంగా ఫ్రాన్స్కు వీటో అధికారం ఉంది.

ఈ మేరకు ఫ్రాన్స్ విదేశాంగ మంత్రి జీన్-నోయెల్ బారోట్ మాట్లాడుతూ, కేవలం ఇరాన్ అణు కార్యక్రమంపై మాత్రమే చర్చలు జరిపితే సరిపోదన్నారు. ఆ దేశ బాలిస్టిక్ క్షిపణి సామర్థ్యాలు, వివిధ ప్రాంతీయ సాయుధ బృందాలకు ఇరాన్ ఇస్తున్న సైనిక మద్దతు వంటి అంశాలను కూడా చర్చల్లో చేర్చాలని ఆయన డిమాండ్ చేశారు. లేదంటే పశ్చిమాసియాలో శాశ్వత శాంతి సాధ్యం కాదని స్పష్టం చేశారు. అంతేకాకుండా, ఈ చర్చల్లో ఫ్రాన్స్ను కూడా ప్రధాన భాగస్వామిగా చేర్చుకోవాలని కోరారు.

ఇరాన్ క్షిపణి వ్యవస్థపై ఫ్రాన్స్ చేసిన డిమాండ్లను అమెరికా అధ్యక్షుడు డొనాల్డ్ ట్రంప్ తోసిపుచ్చారు. ఇరాన్ ఆయుధాలను మాత్రమే నిషేధించడం అన్యాయమని, ఆ దేశాన్ని అంతర్జాతీయంగా బలహీనపరచడం సరికాదని ట్రంప్ వ్యాఖ్యానించారు. ప్రస్తుతం ఇరాన్ వద్ద దీర్ఘ శ్రేణి బాలిస్టిక్ క్షిపణులు లేవని, భవిష్యత్తులో ఆత్మరక్షణ కోసం నిర్మించుకుంటే తనకు అభ్యంతరం లేదని ఆయన తెలిపారు.

ఐక్యరాజ్య సమితి ఆంక్షలు ఎత్తివేయాలంటే భద్రతా మండలిలో తీర్మానం ఆమోదం పొందాలి. శాశ్వత సభ్య దేశాల్లో ఒక్కరు వీటో వేసినా ఆ తీర్మానం ఆగిపోతుంది. ఫ్రాన్స్ వీటో వేస్తే, ఇరాన్కు ఇచ్చిన హామీని అమెరికా నిలబెట్టుకోలేదు. దీంతో శాంతి ఒప్పందం కుప్పకూలే ప్రమాదం ఉంది. ఇప్పటికే ఇజ్రాయిల్ కూడా ఈ ఒప్పందాన్ని వ్యతిరేకిస్తోంది. లెబనాన్పై ఇజ్రాయిల్ చేపట్టిన దాడుల కారణంగా స్విట్జర్లాండ్లో జరగాల్సిన తదుపరి దశ చర్చలు రద్దయ్యాయి.