నిమ్స్‌లో చిన్నారుల గుండె ఆపరేషన్లు ఉచితం; ఆగస్టు 13 నుంచి స్క్రీనింగ్

హైదరాబాద్ నిమ్స్ ఆసుపత్రి గుండె వ్యాధులతో బాధపడుతున్న చిన్నారులకు ఉచిత శస్త్రచికిత్సలు చేయనున్నట్లు ప్రకటించింది. యూకే నుంచి వచ్చే వైద్యుల బృందంతో కలిసి ఈ నెల 13 నుంచి స్క్రీనింగ్ ప్రారంభించనున్నట్లు తెలిపింది. సెప్టెంబర్‌లో సర్జరీలు నిర్వహించనున్నారు.

నిమ్స్ కార్డియోథొరాసిక్ సర్జరీ విభాగం హెడ్ డాక్టర్ అమరేష్ మాట్లాడుతూ, యూకే వైద్య బృందం ప్రతి ఏడాది నిమ్స్‌కు వస్తుందని చెప్పారు. ఈ బృందంతో కలిసి సంక్లిష్టమైన పిడియాట్రిక్ గుండె సర్జరీలు ఉచితంగా చేస్తామని తెలిపారు. ఆరోగ్యశ్రీ, సీఎంఆర్‌ఎఫ్ నిధులు, దాతల సహకారంతో రోగులపై ఎలాంటి డబ్బు భారం పడదని స్పష్టం చేశారు.

15 ఏళ్లలోపు చిన్నారులకు అన్ని రకాల గుండె జబ్బులకు ఈ సౌకర్యం వర్తిస్తుంది. తెలంగాణతో పాటు ఇతర రాష్ట్రాల నుండి వచ్చే రోగులు సైతం సంబంధిత రాష్ట్రాల సీఎంఆర్‌ఎఫ్ లెటర్లు, రోటరీ వంటి దాత సంస్థల నిధుల ద్వారా ఉచితంగానే సర్జరీ చేయించుకోవచ్చు. తల్లిదండ్రులు ఆగస్టు 13 నుంచి నిమ్స్ సీబీటీఎస్ ఓపీడీలో సంప్రదించి స్క్రీనింగ్ చేయించుకోవాలి.

నిమ్స్ నెలకు 25 నుంచి 30 పిల్లల గుండె సర్జరీలను ఇప్పటికే ఉచితంగా చేస్తోందని డాక్టర్ అమరేష్ వెల్లడించారు. మెరుగైన ప్రమాణాలతో సేవలందించేందుకు యూకే టీమ్ రాక ఉపయోగపడుతుందన్నారు. సర్జరీ అనంతరం కూడా నిమ్స్ వైద్యులు రోగులను నిరంతరం పర్యవేక్షిస్తారని, ఆర్థిక ఇబ్బందులతో సర్జరీలకు దూరం కావాల్సిన అవసరం లేదని భరోసా ఇచ్చారు.