హైదరాబాద్‌ గచ్చిబౌలిలో నిర్మాణ ప్రమాదం: ముగ్గురు కార్మికులకు తీవ్ర గాయాలు

హైదరాబాద్ లోని గచ్చిబౌలి టిఎన్జిఓఎస్ కాలనీలో నిర్మాణ ప్రమాదం జరిగింది. భవన నిర్మాణం సందర్భంగా పిల్లర్ గుంతలో మట్టి కూలడంతో ముగ్గురు కార్మికులు తీవ్రంగా గాయపడ్డారు.

నిర్మాణం చేయిస్తున్న వ్యక్తి మురళీకృష్ణ. ఆయన భవనం సెల్లార్ కోసం గుంత తవ్వుతుండగా, సిమెంట్ బెడ్ వేస్తున్న సమయంలో ప్రమాదం సంభవించింది. పక్కనే ఉన్న మట్టి ఒక్కసారిగా కూలి కార్మికులపై పడింది. వీరంతా మధ్యప్రదేశ్ కు చెందిన వారు. మొత్తం ఎనిమిది మంది అక్కడ పనిచేస్తున్నట్లు తెలిసింది.

ప్రమాదం జరిగిన వెంటనే ఇద్దరు బయటపడ్డారు. మరో వ్యక్తి మట్టిలో చిక్కుకున్నాడు. స్థానికులు, పోలీసులు సహాయంతో అతడిని రక్షించారు. ముగ్గురిని కేర్ ఆసుపత్రికి తరలించారు. ప్రస్తుతం వారికి ప్రాణహాని లేదని వైద్యులు తెలిపారు.

ఘటనాస్థలికి చేరుకున్న పోలీసులు, మున్సిపల్ అధికారులు సంఘటనపై దర్యాప్తు చేపట్టారు. ముందస్తు జాగ్రత్తలు తీసుకోకపోవడం, వర్షం కురుస్తున్న సమయంలో సెల్లార్ తవ్వడం కూడా ప్రమాదానికి కారణమైనట్లు అధికారులు భావిస్తున్నారు. ఈ ఘటన తర్వాత సెల్లార్ ను మట్టితో పూడ్చేశారు.