గద్దర్ కూతురు వెన్నెల సికింద్రాబాద్ మహంకాళి అమ్మవారికి మట్టి బోనం సమర్పణ

సికింద్రాబాద్‌లోని మహంకాళి అమ్మవారి ఆలయంలో బోనాల ఉత్సవాలు వైభవంగా జరుగుతున్నాయి. ప్రముఖ ప్రజా గాయకుడు గద్దర్ కూతురు వెన్నెల ఈ సందర్భంగా మట్టి బోనాన్ని సమర్పించారు. గత ఏడాది మాదిరిగానే ఈసారి కూడా ఆమె తెలంగాణ సాంస్కృతిక సారథి సంస్థకు చెందిన 150 మంది మహిళలతో కలిసి బోనం ఎత్తారు.

వెన్నెల మాట్లాడుతూ, మట్టి బోనం భూమికి ప్రతీకగా, స్త్రీల శక్తికి సంకేతంగా ఉంటుందని వివరించారు. ‘మా ఇల్లు, గ్రామం, ప్రపంచాన్ని రక్షించమని అమ్మవారిని కోరుతూ ఈ బోనాన్ని సమర్పిస్తున్నాం’ అని ఆమె చెప్పారు. తన తండ్రి గద్దర్ ఉన్నప్పుడు బియ్యం సమర్పించేవారేమో కానీ బోనం తీసుకువచ్చేవారు కాదని, ఇప్పుడు తాను ఈ సంప్రదాయాన్ని కొనసాగిస్తున్నట్లు తెలిపారు.

గద్దర్ గుర్తింపుగా నిలిచిన గొంగడిని వెన్నెల నిత్యం ధరిస్తారు. ఈ బోనాల్లోనూ ఆమె గొంగడి కప్పుకుని కనిపించారు. ‘గొంగడే నా అస్తిత్వం, నా చిరునామా’ అని ఆమె వ్యాఖ్యానించారు. ఇవాళ తెల్లవారుజాము నుంచే ఆలయానికి భక్తుల రద్దీ మొదలైంది. పెద్ద సంఖ్యలో భక్తులు పాల్గొన్న ఈ కార్యక్రమంలో పోలీసులు ప్రత్యేక భద్రత ఏర్పాటు చేశారు.