గద్వాలలో ఇసుక మాఫియా ఆరోపణలతో ఫోన్ ఆడియో వైరల్

జోగులంబ గద్వాల జిల్లాలో ఇసుక అక్రమ రవాణాకు సంబంధించిన ఫోన్ సంభాషణ ఆడియో సోషల్ మీడియాలో వైరల్ అయ్యింది. ఇందులో ఇసుక వ్యాపారులు ఎస్ఐ, సీఐ, డీఎస్పీ వంటి పోలీసు అధికారులకు మామూలు చెల్లిస్తున్నట్టు మాట్లాడుకుంటున్నారు. ఆడియోలో ఎమ్మెల్యే అనుమతి లేకుండా రవాణా సాధ్యం కాదని, అనుమతి కోసం డబ్బులు చెల్లించాలని కూడా చెప్పారు.

ఈ సంభాషణలో పట్టణ ఎస్ఐకి రూ.30,000, రూరల్ ఎస్ఐకు రూ.20,000, డీఎస్పీకి రూ.50,000, సీఐకు రూ.20,000 చెల్లించినట్టు వ్యాపారులు పేర్కొన్నారు. ప్రతి వాహనానికి “టీడీ నరసింహ” అనే వ్యక్తికి రూ.5,000 చెల్లించినట్టు వివరాలు ఉన్నాయి. ఈ ఆడియోపై స్థానికంగా చర్చ మొదలైంది.

ఇసుక అక్రమ తవ్వకాలు, రవాణాపై ఇప్పటికే అనేక ఫిర్యాదులు ఉన్నాయి. ప్రభుత్వం ఇసుక విక్రయాలను ప్రోత్సహించేందుకు ఆన్‌లైన్ బుకింగ్ విధానం అమలు చేస్తోంది. అయినప్పటికీ మాఫియా కొనసాగుతుండడం ఆందోళన కలిగించే అంశం.

వైరల్ అయిన ఈ ఆడియోపై పోలీసు ఉన్నతాధికారులు ఇంకా స్పందించలేదు. స్థానిక ఎమ్మెల్యే నుండి ఈ విషయంపై స్పందన రాలేదు.