ఓయూలో జెన్‌జీ విద్యార్థుల పోరుబాట: ఉద్యోగాలు, ఫీజు రీయింబర్స్మెంట్ డిమాండ్

ఉస్మానియా యూనివర్సిటీలో జెన్‌జీ విద్యార్థి సంఘం పోరుబాట కార్యక్రమం నిర్వహించింది. ఆర్ట్స్ కళాశాల వద్ద ఏర్పాటు చేసిన గోడ పత్రికను సంఘం వ్యవస్థాపక అధ్యక్షుడు శివాజీ నాయక్ ఆవిష్కరించారు.

ఈ సందర్భంగా శివాజీ నాయక్ మాట్లాడుతూ ఏడు ప్రధాన డిమాండ్లను ప్రభుత్వం ముందుకు తెచ్చామన్నారు. విద్యా హక్కు చట్టాన్ని పూర్తిగా అమలు చేయాలని, ఫీజు రీయింబర్స్మెంట్ నిధులు తక్షణమే విడుదల చేయాలని కోరారు. కార్పొరేట్ కాలేజీల్లో ఆర్టీఈ చట్టం అమలు చేసి ఫీజులు తగ్గించాలని డిమాండ్ చేశారు.

జాతీయస్థాయిలో కేంద్ర ప్రభుత్వం 10 లక్షలు, రాష్ట్ర ప్రభుత్వం 2 లక్షల ఉద్యోగ నోటిఫికేషన్లు ఒకేసారి విడుదల చేయాలన్నారు. కుల ఆధారిత రిజర్వేషన్ల స్థానంలో బీపీఎల్ ప్రాతిపదికన రిజర్వేషన్లు కల్పించాలని కోరారు. అలాగే 75 శాతం స్థానికుల రిజర్వేషన్‌ను తగ్గించాలని, ఎన్నికైన ప్రజాప్రతినిధులను రీకాల్ చేసే వ్యవస్థను ప్రవేశపెట్టాలని డిమాండ్ చేశారు.

డిమాండ్లు అమలు చేయకపోతే పెద్ద ఎత్తున ఉద్యమాలు నిర్వహిస్తామని శివాజీ నాయక్ హెచ్చరించారు. ఈ సందర్భంగా విద్యార్థులు పెద్ద సంఖ్యలో నినాదాలు చేశారు.