పోలవరం: గండి పోచమ్మ ఆలయాన్ని చుట్టుముట్టిన గోదావరి వరద, దర్శనాలు నిలిపివేత

పోలవరం ప్రాజెక్ట్ వద్ద గోదావరి నదికి వరద ఉద్ధృతి పెరుగుతోంది. ఎగువ ప్రాంతాల నుంచి భారీగా వరద నీరు రావడంతో గండి పోచమ్మ అమ్మవారి ఆలయం పూర్తిగా జలదిగ్బంధంలో చిక్కుకుంది. ఆలయ అంతరాలయంలోకి వరద నీరు ప్రవేశించి అమ్మవారి విగ్రహం తలభాగం వరకు చేరింది. ఆలయ ప్రాంగణం మొత్తం నీటిలో మునిగిపోయింది.

పరిస్థితిని దృష్టిలో ఉంచుకుని అధికారులు అమ్మవారి దర్శనాలను తాత్కాలికంగా నిలిపివేశారు. ఆషాఢ మాసం ఆదివారం కావడంతో భక్తులు పెద్ద సంఖ్యలో వచ్చారు. అయితే వారిని గట్టు పైనే నిలిపివేసి, దూరం నుంచే దర్శనం చేసుకునేలా ఏర్పాట్లు చేశారు.

వరద ప్రభావం కారణంగా ఇందుకూరుపేట, దేవీపట్నం, రంపచోడవరం వైపు వెళ్ళే రహదారులు నీటిలో మునిగాయి. దీంతో రాకపోకలు పూర్తిగా నిలిచిపోయాయి. మోకాలి లోతు నీరు ఉన్నప్పటికీ కొందరు భక్తులు సాహసం చేసి ఆలయానికి చేరుకోవడంతో అధికారులు అప్రమత్తమయ్యారు. భక్తులు నీటిలోకి వెళ్లకుండా పోలీసు బందోబస్తు ఏర్పాటు చేశారు.

వరద ప్రవాహం మరింత పెరిగే అవకాశం ఉన్నందున ప్రజలు మరియు భక్తులు అప్రమత్తంగా ఉండాలని అధికారులు సూచిస్తున్నారు.